حـەز ژ وی بــکە
حـەز ژ وی بــکە
چونكى حه‌ژێكرنا ته بۆ وى دێ بته ده‌رگه‌هێ گوهدارییا ته بۆ ئه‌مرێ وى، وگوهدارییا ل سه‌ر حه‌ژێكرنێ دئێته ئاڤاكرن طاعه‌تێ دورسته، وئه‌و دلێ ژ ڤیانێ ڤالا بت وه‌كى وى خانییێ كاڤله یێ ژ مرۆڤان وێران بووى.. ما دێ صه‌بره‌ك لێ هه‌بت؟
ڤیانا پێغه‌مبه‌رى ژ ڤیانا خودێیه:
پشتى بۆ مه دیاربووى كو ڤیانا پێغه‌مبه‌رى -سلاڤ لێ بن- ژ پێتڤییێن تمامبوونا باوه‌رییا مـرۆڤـێ موسلمانه، دڤێت ئه‌م باش بزانین كو ڤیانا پێغه‌مبه‌رى -سلاڤ لێ بن- ژ ڤیانا خودێیه، وتشته‌كێ به‌رعه‌قل نینه ڤیانا وان هه‌ردووان بێته ژێكڤه‌كرن، یان ئێك ژ وان ب تنێ د دله‌كێ خودان باوه‌ر دا په‌یدا ببت.
چاوا دێ حه‌ز ژ وى پێغه‌مبه‌رى كه‌ى یێ به‌رێ ته دایه وى، وتو حه‌ز ژ وى ب خۆ ناكه‌ى؟ یان چاوا دێ حه‌ز ژ وى كه‌ى وتو حه‌ز ژ وى پێغه‌مبه‌رى ناكه‌ى یێ وى بۆ ته هنارتى؟
وچونكى مه‌سه‌له یا ب ڤى ڕه‌نگییه، ڤیانا خودێ وپێغه‌مبه‌رى وى -سلاڤ لێ بن- پێكڤه بوو ئێك ژ وان سێ تشتان یێن وه ل خودانى دكه‌ن كو ئه‌و تام بكه‌ته شرینییا باوه‌رێ.
بۆچى ئه‌م حه‌ز ژ خودێ بكه‌ین؟
چونكى ئه‌و یێ ژ هه‌ژى ڤیانێیه:
چاوا تو حه‌ز ژ وى نه‌كه‌ى وئه‌وه خودێ؟ قه‌نجى ونعمه‌تێن وى ژیانا ته هه‌مى ڤه‌گرتینه، ئه‌گه‌ر وى به‌رێ ته نه‌دابا خۆ، نوكه به‌رێ ته دا ل كیڤه بت؟ د كیژ نهالا سه‌رداچوونێ دا تو دا یێ به‌رزه بى؟
ڕۆژا تو ب سه‌ر ڤێ دنیایێ كه‌فتى تشته‌ك ژ مه‌صلحه‌تا خۆ ته نه‌دزانى، وى ده‌سته‌كێ دلۆڤان ودله‌كێ نه‌رم بــۆ تــه په‌یدا كر حه‌تا تــو وه لێ هـاتـى بشێى ژیانا خۆ ب ڕێڤه ببه‌ى، ووى عه‌قله‌ك دا ته تو بشێى باشى وخرابییێ پێ ژێك جودا بكه‌ى، ووى هند قه‌نجى د گه‌ل ته كرن كو ئه‌گه‌ر جاره‌كێ تو ده‌ست پێ بكه‌ى دا وان بهژمێرى تو نه‌شێى وێ چـه‌نــدێ بـكــه‌ى.. و د گــه‌ل هندێ ژى ده‌مێ ته شوكرا وى نه‌كرى، وتو به‌ر ب خــرابـــى وگـونــه‌هــێ ڤه چووى، وى كرێتییێن ته ڤه‌شارتن، وشه‌رما ته پێ نه‌بر، ته ب گونه‌هان به‌رسڤا نعمه‌تێن وى دا، و ب ستاره‌كرنێ وى به‌رسڤا نه‌زانینا ته دا، گونه‌ها ته ڤه‌شارت، وعه‌یبا ته نیشا خه‌لكى نه‌دا؛ چونكى ئێك ژ ناڤێن وى (غه‌ففاره) ڕه‌نگ وڕویێ ته یێ ب سه‌رڤه وبه‌رچاڤ وى جوان وتازه كر؛ دا خه‌لك ببینن، وناڤخۆییا ته وى ڤه‌شارت؛ دا كه‌س ب ته نه‌حسیێت ده‌مێ تو دلێ خۆ دبه‌یه غشێ وخیانه‌تێ، وهزرێن خه‌له‌ت، وخرابییێ، وئه‌گه‌ر وى ئه‌و لا ژى ژ ته ئاشكه‌را كربا، كه‌سێ تو نه‌دڤیاى وقه‌درێ ته نه‌دگرت، چونكى ئێك ژ سالۆخه‌تێن وى (ساتر الذنب)ه.
كه‌ره‌ما وى بێ به‌رانبه‌ر ژ عه‌سمانى ب ســه‌ر تــه دا دبارت، وخرابیێن ته بێ حساب ژ عه‌ردى ب نك وى ڤه دئێنه بلندكرن، و د گه‌ل هندێ ژى ئه‌و دبێژته ته: (يَا ابْنَ آدَمَ إِنَّكَ مَا دَعَوْتَنِي وَرَجَوْتَنِي غَفَرْتُ لَكَ عَلَى مَا كَانَ فِيكَ وَلاَ أُبَالِي)كوڕێ ئاده‌مى، هندى تو دوعا وهیڤییان ژ من بكه‌ى ئه‌ز دێ گونه‌هێن ته غه‌فرینم، بلا ته چ كربت ژى، ومن چو مننه‌ت پێ نینه(يَا ابْنَ آدَمَ لَوْ بَلَغَتْ ذُنُوبُكَ عَنَانَ السَّمَاءِ ثُمَّ اسْتَغْفَرْتَنِي غَفَرْتُ لَكَ، وَلاَ أُبَالِي)كوڕێ ئاده‌مى، ئــه‌گه‌ر گونه‌هێن تـــه بگه‌هنه به‌ر په‌ڕێن عه‌سمانى پاشى تـــو داخوازا غه‌فراندنێ ژ من بكه‌ى ئه‌ز دێ وان بۆ ته غه‌فرینم، ومن چو مننه‌ت پێ نینه(يَا ابْنَ آدَمَ إِنَّكَ لَوْ أَتَيْتَنِي بِقُرَابِ الأَرْضِ خَطَايَا ثُمَّ لَقِيتَنِي لاَ تُشْرِكُ بِي شَيْئًا لأَتَيْتُكَ بِقُرَابِهَا مَغْفِرَةً)كوڕێ ئاده‌مى، ئه‌گه‌ر تو بێیه نك من وته تژى عه‌ردى گونه‌هـ هه‌بن، پاشى تو بێى وته چو شریك بۆ من چێ نه‌كربن، ئه‌ز ب تژى عه‌ردى ڤه مه‌غفره‌ت دێ ئێمه نك ته.
ئه‌رێ خودایه‌كێ باشییا وى هنده بت ما یێ ژ هه‌ژى هندێ نینه تو حه‌ز ژێ بكه‌ى؟
به‌رێ خۆ بدێ چاوا خودێناسان حه‌ز ژ وى دكر وژێ ب هیڤى بوون:
ل ئێڤارا ڕۆژا عه‌ره‌فێ فوضه‌یلێ كوڕێ عیاضى به‌رێ خۆ دا خه‌لكى، هه‌مییان ده‌ستێن خۆ بلندكربوون وب چاڤێن تژى ڕۆندك ڤه هه‌وار دكره خودێ.. فوضه‌یلى گۆته هنده‌ك كه‌سێن ل دۆر وڕه‌خێن خــۆ: بـاشــه ئه‌گه‌ر ئه‌ڤه ب ڤى ڕه‌نگى داخوازا چه‌ند فلسه‌كێن كێم ژ زه‌لامه‌كى بكه‌ن، ئه‌و دێ وان ده‌ست ڤالا زڤڕینت؟ وان گــۆت: نه‌خێر، فــوضــه‌یــلـــى گــۆت: ئه‌ز ب خودێ كه‌مه، مه‌غفره‌ت ل نك خــودێ بـێ بهاتره ژ چه‌ند فلسه‌كان ل نك ئێك ژ هه‌وه ڤێجا چاوا ئه‌و دێ ڤان ده‌ست ڤالا زڤڕینت؟!
ئه‌و حه‌ز ژ ته دكه‌ت، ڤێجا بۆچى تو حه‌ز ژ وى نه‌كه‌ى؟
چونكى ئه‌و ب غار ب نك ته‌ڤه دئێت:
به‌لێ هه‌ر جاره‌كا ته ئه‌و نیاسى، وتو ب نك ڤه چووى، ئه‌گه‌ر خۆ هێدى ژى بت، ئه‌و ب غار دێ ب نك ته‌ڤه ئێت.. ما وى ب خۆ نه‌گۆتییه: (وَمَنْ أَتَانِي يَمْشِي أَتَيْتُهُ هَرْوَلَةً)هه‌چییێ هێدى ب نك من ڤه بێت، ئه‌ز ب غار دێ ب نك وى ڤه چم.. وحاشاى وى كو وى مننه‌ت ب ته هه‌بت، بۆ چ ئه‌و دێ ب له‌ز ب نك ته ڤه ئێت؟ دا فایده‌یه‌كى ژ ته بكه‌ت؟ یان دا تو قه‌نجییه‌كێ ل وى بكه‌ى؟ نه.. ئه‌و ژ هندێ مه‌زنتره وى هه‌وجه‌ییه‌ك ب ته هه‌بت، وتو ژ هندێ كێمترى تو مفایه‌كى بگه‌هینییه وى، ئه‌و هۆسا ب نك ته ڤه دئێت چونكى وى مه‌صلحه‌تا ته دڤێت..
تو خێره‌كێ دكه‌ى ئه‌و وێ بۆ ته كێم كێم ب ده‌هان حسێب دكه‌ت، وگاڤا ته گونه‌هه‌ك كر ئه‌و دێ بێژته ملیاكه‌تێن خۆ: خۆ لێ بگرن، نه‌نڤیسن، به‌لكى تۆبه بكه‌ت.. وئه‌گه‌ر ته تۆبه نه‌كر ژى ئه‌و وێ بۆ ته ب ئێكێ دنڤیسن!
ئه‌رێ خودایه‌كێ باشییا وى هنده بت ما یێ ژ هه‌ژى هندێ نینه تو حه‌ز ژێ بكه‌ى؟
هه‌ر شه‌ڤ ئه‌و یێ ل هیڤییا ته:
چونكى ئه‌و حه‌ز ژ ته دكه‌ت، گونه‌هێن گونه‌هكاران، وپشتدانا دفنبلندان وى ژ هندێ ناده‌ته پاش كو هه‌ر شه‌ڤ ده‌مێ سێئێكا دویماهییێ دمینت، ئه‌و -ب ڕه‌نگه‌كێ بابه‌تى وى بت- بێته عه‌سمانێ دنیایێ وگازى غافل ونڤستییان بكه‌ت: كى هه‌یه دوعایه‌كێ بۆ خۆ ژ من بكه‌ت دا ئه‌ز دوعایا وى بۆ ب جهـ بینم؟ كێ داخوازه‌ك هه‌یه دا ئه‌ز داخوازا وى بۆ ب جهـ بینم؟
وتو یێ نڤستى وته هاى ژێ نه!!
ئه‌گه‌ر تو بزانى مرۆڤه‌كێ ده‌وله‌مه‌ند به‌رى سپێدێ دێ ئێته فلان جهى وكێ چ بڤێت ژ مالێ دنیایێ دێ ده‌تێ، تو بێژى وى ده‌مى تو بنڤى وبێژى: نه لازمه؟
ئه‌گه‌ر مرۆڤه‌ك قه‌نجییه‌كا مه‌زن ل ته بكه‌ت، كو تو خۆ ببینى قه‌ردار ب عه‌مرێ خۆ بۆ وى، پاشى ئه‌و بێژته ته: ل نیڤا شه‌ڤێ یان به‌رى سپێدى فلان تشتى بۆ من بینه، ما تو له‌زێ ناكه‌ى ونابێژى: وى قه‌نجییا د گه‌ل من كرى؟
ئه‌ڤه خودایێ ته، ئه‌و ژ هه‌ر ئێكى ده‌وله‌مه‌ندتر، یێ ژیانا ته هه‌مى ژ قه‌نجییا وى، یێ ته بۆ سفرا كه‌ره‌ما خۆ ڤه‌دخوینت، ما نه شه‌رمه تو خۆ د ناڤ نڤینان ڕا بپێچى، وخۆ ژ وى بێ منه‌ت كه‌ى؟
بێى داخوازا ته وى تو یێ پاراستى:
به‌رێ خۆ بده به‌رپه‌ڕێن ژییێ خۆ.. چه‌ند جاران وى تو ژ هیلاكێ، یان شه‌رمزارییێ پاراستى بێى كو ته هاى ژێ هه‌بت، یان ته داخوازا وێ چه‌ندێ ژێ كربت؟
حه‌كیمێ كوڕێ حزامى ئێك ژ صه‌حابییێن پێغه‌مبه‌رى بوو -سلاڤ لێ بن- ل شه‌ڕێ به‌درێ د گه‌ل كافران هاتبوو شه‌ڕى، هـویـن دزانن پشتى ئه‌و موسلمان بووى، سویندا وى چ بوو؟ وى دگۆت: ئه‌ز ب وى كه‌مه یێ ڕۆژا به‌درێ ئه‌ز ژ كوشتێ ڕزگار كریم.
وى هزرا خۆ دكر، ئه‌رێ ئه‌گه‌ر ڕۆژا به‌درێ ئه‌و ل سه‌ر كوفرێ هاتبا كوشتن، وه‌كى وان حه‌فتێ هه‌ڤالێن وى ئه‌وێن هاتینه كوشتن، حالێ وى دا چ بت؟
ما ئه‌ڤه نه نعمه‌ته‌كا مه‌زنه خودێ د گه‌ل وى كرى بێى كو وى داخواز كربت؟
ئه‌بوو سوفیان.. ئه‌وێ پترییا عه‌مرێ خۆ د كوفرێ دا بۆراندى، دوازده سالێن دویماهییێ ژ عه‌مرێ خۆ خودێ نعمه‌ت ب ئیسلامێ د گه‌ل كر، گاڤا كه‌فتییه به‌ر مرنێ هنده‌ك مرۆڤێن وى كره گرى، وى گۆته وان: بۆ من نه‌كه‌نه گرى، ئه‌ڤه ڕۆژا ئه‌ز موسلمان بوویم حه‌تا ئه‌ڤرۆ ئه‌ز ب گونه‌هه‌كا ب تنێ ژى قڕێژى نه‌بوویمه!
ده‌مێ تو له‌زا گونه‌هكاران به‌ر ب گونه‌هێ ڤه دبینى، تو بیرا خۆ ل وێ قه‌نجییا مه‌زن دئینییه ڤه یا خودێ د گه‌ل ته كرى كو تو وه‌كى ئێك ژ وان لێ نه‌كرى؟
به‌لكى ئێكێ موبته‌لا ژ هه‌وه بێژت: پا تو بۆ من چ دبێژى وئه‌ز هنده یێ كه‌تیمه به‌لایێ؟
بۆ ته دێ بێژین: چونكى ئه‌و حه‌ز ژ ته دكه‌ت له‌وا وى تو یێ ئێخستییه به‌لایێ.. به‌لێ! وبه‌لكى ئه‌ڤه ل به‌ر مرۆڤان تشته‌كێ غه‌ریب بت (حه‌ز ژ من دكه‌ت به‌لایێ دئینته ڕێكا من!!) ئه‌ڤه چونكى ئه‌م كورت به‌رێ خۆ دده‌ینه مه‌سه‌لێ، ویا ژ مه ڤه ئه‌صل وبناخه د مه‌سه‌لا ڤیان ونه‌ڤیانێ دا خۆشى ودانا دنیایێیه، وئه‌و ب خۆ مه‌سه‌له یا وه‌سا نینه! چه‌ند جاران به‌لایێ تــو هشیاركـــرى وبــه‌رێ تـه دایـه وى؟ چه‌ند جاران تو یێ دویر بووى ژ وى وبه‌لایێ تو نێزیكى وى كرى؟ صه‌برێ ل سه‌ر به‌لایێ بكێشه ما ته نه‌ڤێت تو ئێك ژ وان بى یێن بێ حسێب خێر بۆ دئێته‌دان؟
(الزمر عشرة)(الزمر: 10)
ئه‌رێ ئه‌گه‌ر به‌لا نه‌بت، صه‌بر دێ یا چ بت؟
((ئه‌وێ هزر بكه‌ت دلۆڤانییا خودێ وقه‌ده‌را وى ژێكڤه دبن، ئه‌و مرۆڤه‌كێ كورته‌بینه)).
ئبن عه‌طائێ ئه‌سكه‌نده‌رانى
وى تو ب گوننه‌هێ نه‌برییه هیلاكێ:
هه‌ر چه‌نده ته هند گونه‌هـ وته‌خسیرى د ده‌ر حه‌قا وى دا كرینه كو ئه‌گه‌ر وى حسێبه‌كا هویر د گه‌ل ته كربا تو دا هه‌ژى تێبرنێ بى، خودێ د ئایه‌ته‌كێ دا به‌حسێ مرۆڤێن وه‌كى من وته دكه‌ت ده‌مێ دبێژت:
(فاطر خمس و اربعون)(فاطر: 45) یه‌عنى: ئه‌گه‌ر خودێ مرۆڤ ب كریارێن وان گرتبان، وى خودان رحه‌كێ ل سه‌ر عه‌ردى ب ڕێڤه دچت ل سه‌ر پشتا عه‌ردى نه‌دهێلا..
ده‌مێ نعمه‌ته‌ك دگه‌هته ته تو حه‌مدا وى بكه كو وى ب ره‌حما خۆ ئه‌و نعمه‌ت دایه ته، و ژ به‌ر گوننه‌هێن ته ئه‌و ل سه‌ر ته نه‌كرییه عه‌زاب.
وحه‌ز ژ وى بكه چونكى ئه‌و ته ژ دنیایێ دپارێزت:
تو گه‌له‌ك دنیایێ ژ وى دخوازى، به‌لێ ئه‌و هندێ ژێ دده‌ته ته كو تو پێ د سه‌ردا نه‌چه‌ى، وئه‌گه‌ر وى ب یا ته كربا، نوكه ژ مێژه تو چووبوویه هیلاكێ.. گوهێ خۆ بدێ چاوا پێغه‌مبه‌ر -سلاڤ لێ بن- ڤێ مه‌سه‌لێ بۆ مه روهن دكه‌ت: (إِنَّ الله لَيَحْمِي عَبْدَهُ المُؤْمِنَ مِنَ الدُّنْيَا ، وَهُوَ يُحِبُّهُ، كَمَا تَحْمُونَ مَرِيضَكُمْ مِنَ الطَّعَامِ وَالشَّرَابِ تَخَافُونَهُ عَلَيْهِ)هندى خودێیه عه‌بدێ خۆ یێ خودان باوه‌ر ژ دنیایێ دپارێزت، وئه‌و حه‌ز ژ وى دكه‌ت، كا چاوا هوین نساخێ خۆ ژ خوارن وڤه‌خوارنی دپارێزن، ژ به‌ر ترسا هه‌وه ل سه‌ر وى.
هه‌وه دیت مه‌سه‌له یا چاوایه؟
ئبن عه‌طائێ ئه‌سكه‌نده‌رانى ڤێ مه‌عنایێ ژ حه‌دیسێ وه‌ردگرت ودبێژته ته: ((به‌لكى ئه‌و ب نه‌دانێ بده‌ته ته، وبه‌لكى ب دانێ نه‌ده‌ته ته، هه‌ر جاره‌كا وى ده‌رگه‌هێ تێگه‌هشتنێ د نه‌دانێ دا ل به‌ر ته ڤه‌كر، نه‌دان ل به‌ر ته دێ بته عه‌ینى دانێ، ده‌مێ ئه‌و دده‌ته ته ئه‌و قه‌نجییا خۆ نیشا ته دده‌ت، وده‌مێ ژ ته مه‌نعه دكه‌ت ئه‌و شیانا خۆ نیشا ته دده‌ت، وهه‌ردو جاران ئه‌و خۆ ب ته دده‌ته نیاسین، و ب هه‌بوونا قه‌نجییا وى ل سه‌ر ته ئه‌و ب نك ته‌ڤه دئێت، وهه‌ما نه‌دان ته دئێشینت چونكى ته حكمه‌تا وى د وێ چه‌ندێ دا نه‌زانییه)).
چاوا دێ حه‌ز ژ وى كه‌ی؟
جاره‌كێ ده‌مێ تو یێ ب تنێ د گه‌ل خۆ زنجیرا بیرهاتنێن خۆ دوباره بكه، وبه‌رێ خۆ بدێ ل كیژ جهى پتر ژ هه‌ر جاره‌كا دى ره‌حما خودێ ب ته ڕا گه‌هشتییه، وتو ژ تێچوون یان گرفتارى یان شه‌رمزارییه‌كا مه‌زن ڕزگار كرى.. پاشى ڤێ پسیارێ ژ خۆ بكه:
- ئه‌رێ ما ئه‌و خودایێ ئه‌ڤ قه‌نجییه د گه‌ل من كرى یێ هێژاى هندێیه نینه ئه‌ز حه‌ز ژ وى بكه‌م، وبێ ئه‌مرییا وى نه‌كه‌م؟
ئیبراهیمى ئه‌و جهـ ل ناڤ ئاگرى دیت، ده‌مێ ملله‌تێ وى ئه‌و كرییه د مه‌نجه‌نیقێ دا وهاڤێتییه د نیڤا ئاگرى دا، ویووسفى ئه‌و د بنێ بیرێ وكونجا گرتیخانه‌یێ ڤه دیت، یوونسى ئه‌و د زكێ نه‌هنگى دا دیت، ومووساى ده‌مێ ده‌یكا وى ئه‌و هاڤێتییه د ڕویبارى دا، وموحه‌ممه‌دى ده‌مێ وى وهه‌ڤالێ خۆ قه‌ستا شكه‌فتێ كرى وكافر هاتینه به‌ر ده‌رى.. سلاڤ ل وان هه‌مییان بن.
وته ل كیژ جهى د ژیانا خۆ دا ئه‌و دیتییه؟
د سه‌رهاتییان دا دبێژن: مرۆڤه‌كێ ده‌وله‌مه‌ند هه‌بوو گه‌له‌ك خێر ب مالێ خۆ دكرن، وشوكه‌ره‌كا به‌رده‌وام دكر، زه‌مانه‌ك ب سه‌ر دا هات ئه‌و هاته گوهاڕتن، شوكرا وى كێم بوو، وخێرێن وى هاتنه بڕین، وبه‌ر ب گوننه‌هێ ڤه چوو، د گه‌ل هندێ ژى خودێ نعمه‌تا خۆ ژێ نه‌ستاند، ئینا جاره‌كا دل هشیار دبت وى گازى كر: یا ره‌ببى طاعه‌تێ من بۆ ته هاته گوهاڕتن، ونعمه‌تا ته ل سه‌ر من نه‌هاته گوهاڕتن، هنگى ده‌نگه‌ك هاتێ:
- (یا هذا لأیام الوصال عندنا حرمة، حفظناها وضیعتها) فلان كه‌س.. ڕۆژێن ویصالێ قه‌درێ خۆ ل نك مه هه‌یه، مه ئه‌و پاراستن وته ژ بیركرن!
چاوا دێ زانى كو تو حه‌ز ژ وى دكه‌ی؟
ئه‌گه‌ر وه ل ته هات كو ته هه‌وجه‌یى ب هندێ نه‌بت كه‌س بیرا ته ل وى بینته ڤه، چونكى كێمترین (مه‌بده‌ئێ) حـه‌ژێـكـرنێ ئه‌وه ئه‌وێ تو حه‌ژێ دكه‌ى چو جاران ژ بیرا ته نه‌چت، ئبن قه‌ییم دبێژت: ((وه‌ى بۆ وى كه‌سێ ب ناڤێ حه‌ژێكرنێ دئاخڤت، وئه‌وى هه‌وجه‌یى ب هندێ هه‌یه ئێك بیرا وى ل خۆشتڤییێ وى بینته ڤه، وئه‌گه‌ر كه‌سه‌ك بیرا وى لێ نه‌ئینته ڤه بیرا وى لێ نائێته ڤه)).
ئه‌و چ حه‌ژێكرنا عه‌جێبه ئه‌و پێ دئاخڤت!
وئیمامێ غه‌زالى به‌حسێ ڕێكه‌كا دى ژى دكه‌ت تو ڤیانا خۆ بۆ وى پێ بجه‌ڕبینى، ئه‌و ژى ئه‌ڤه‌یه: ده‌مێ تو دچییه سه‌ر جهێ خۆ بۆ نڤستنێ وبه‌رى تو بنڤى، كى دئێته سه‌ر هزرا ته، وتو ناڤێ كێ د گه‌ل خۆ دئینى؟ وده‌مێ سپێدێ تو ژ خه‌و ڕادبى ئێكه‌مین كه‌س دئێته سه‌ر هزرا ته وتو ناڤێ وى دئینى كییه؟ ئه‌ها ئه‌و تو ژ هه‌مییان پتر حه‌ز ژ وى دكه‌ى، ڤێجا پسیارێ ژ خۆ بكه: ئه‌رێ خودێیه دویماهى كه‌س ب شه‌ڤێ وئێكه‌مین كه‌س ل سپێدێ دئێته سه‌ر هزرا ته؟ ئه‌گه‌ر به‌رسڤا ته (ئه) بت، ئه‌و ڤیانا ته بۆ وى یا دورسته!
فَإذَا انْتَبَهتُ فأنت أولُ فِكْرَتي
وَإذا أویْتُ فَأنـت آخِرُ زَادي
ده‌مێ سپێدێ ئه‌ز هشیار دبم تو ئێكه‌مین هزرى بۆ من، وده‌مێ ئه‌ز دزڤڕمه سه‌ر جهێ خۆ ب شه‌ڤێ تو زادێ من یێ دویماهییێ یى!
وئه‌گه‌ر ئه‌ز یێ وه‌سا نه‌بم، ئه‌و ڤیانا من بۆ ته گۆتنا ده‌ڤییه!!
ل دویماهییێ:
تشتێ ژ هه‌مییێ خۆشتڤیتر ل به‌ر ئه‌ڤیندارى ئه‌وه ده‌مێ دمینته ب تنێ د گه‌ل خۆشتڤییێ خۆ ودویر ژ چاڤان (موناجاتێ) د گه‌ل وى دكه‌ت، ل دویماهییا شه‌ڤێ.. ده‌مێ تارى ل عه‌ردى دژوار دبت، وئه‌ڤیندارێن دورست ئاشكه‌را دبن، خه‌وێ ژ چاڤێن خۆ ڤه‌دڕه‌ڤینن، وى ده‌مى ژ ده‌ستێ خۆ نه‌كه.. ڕابه قه‌ستا (موناجاتا) وى بكه، ووه‌كى مووسایى -سلاڤ لێ بن- بێژێ: (طه اربع و ثمانون)(طه: 84) چونكى ل وى ده‌مى هه‌ر شه‌ڤ ئه‌و دئێته عه‌سمانێ دنیایێ، وئه‌و ته بۆ حه‌ضره‌تا خۆ داخواز دكه‌ت، ڤێجا ئه‌گه‌ر تو ئه‌ڤینداره‌كێ ڕاست ودورستى خۆ ژ ژڤانى نه‌ده پاش، ب هێجه‌تا هندێ كو خه‌وا وى ده‌مى یا شرینه!
کومــێتــدان لسـه‌ر بابــه تـی