ئه‌وێن هه‌سه‌نگا خو ل نک خودێ هه‌بوو
ئه‌وێن هه‌سه‌نگا خو ل نک خودێ هه‌بوو
ب ڕه‌خ وێ مێرگا به‌حه‌شتێ ڤه ئه‌وا خودێ ژ كه‌ره‌ما خۆ د ڤێ دنیایا مه دا داناى، ل نێزیكى وێ پارچـه‌یــا بــه‌خــتــه‌وه‌ر ژ عه‌ردی، ئه‌وا پێغه‌مبه‌رێ خۆشتڤى د ژیانا وى دا ل سه‌ر پشتا خۆ هلگرتى، وپشتى مرنا وى ئه‌و د ناڤ زكێ خۆ دا حه‌واندى، ڕێزا ئێكێ ژ ڤێ كتێبێ مه ده‌ست پێ كر.. وئه‌گه‌ر هه‌ر نڤیسه‌ره‌كى مافێ گه‌شبینییێ هه‌بت كو نڤیسینا وى پشكه‌كا مه‌زن ژ وێ ئارمانجێ ب ده‌ست خۆ ڤه بینت یا وى بۆ خۆ داناى، بۆ مه ژى هه‌یه ئه‌م دگه‌شبین بین كو ئه‌ڤ نڤیسینا مه بگه‌هته وێ ئارمانجا مه ل به‌را خۆ داناى ده‌مێ مه ده‌ست ب نڤیسینا وێ كرى:
* كـو مــه ل نــك خـــودایـێ خۆ سه‌نگه‌كا گران، و(وه‌زنه‌كێ) ب بها هه‌بت، ئه‌گه‌ر چ حــه‌ژێـكــه‌رێـن دنیایێ ڤێ سه‌نگێ -ب دیتنا خۆ یا كورت- نه‌بینن، وچو هزران بۆ نه‌كه‌ن ژى..
* كو ئه‌ڤ گۆتنێن مه كاره‌كێ به‌رچاڤ د دل وگیانێ وان كه‌سان ژى دا هه‌بت یێن ژ ڤێ مه‌سه‌لا گرنگ دبێ ئاگه‌هـ، مه‌سه‌لا كو دڤێت ئه‌و كاره‌كێ وه‌سا بكه‌ن سه‌نگێ وان پێ ل نك خودێ گران ببت.
ژ به‌ر كو ڕۆژه‌كا (حه‌تمى) یا كو هه‌ر دێ ئێت، ل به‌را مه هه‌مییان هه‌یه، ڕه‌نگێ كێشان وبهادارییێ تێدا دئێته گوهاڕتن، وئه‌و وه‌كى وى ڕه‌نگى نابت یێ ئه‌م ئه‌ڤرۆ دبینین، تو دێ بینى هنده‌ك كه‌س وێ ڕۆژێ دێ ئێن د دنیایێ دا سه‌رتبلان هه‌مییان ئیشاره‌ت ددایێ، وجهێ ئه‌و چووبانێ هه‌یى ونه‌یى ئه‌و بوون، ژ به‌ر كو خه‌لكێ دنیایێ هزر دكر ئه‌و ژ وان چیایان ب سه‌نگترن یێن عه‌ردێ مه ڕادگرن.. هنگى دێ بینى ئه‌و دێ ئێن، وسه‌نگا ئیك ژ وان گه‌له‌ك ژ یا پێشییێ -ل نك هه‌وه ئه‌ڤرۆ- سڤكتره:
(قُلْ هَلْ نُنَبِّئُكُم بِالْأَخْسَرِينَ أَعْمَالًا ﴿١٠٣﴾ الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا ﴿١٠٤﴾ أُولَـٰئِكَ الَّذِينَ كَفَرُوا بِآيَاتِ رَبِّهِمْ وَلِقَائِهِ فَحَبِطَتْ أَعْمَالُهُمْ فَلَا نُقِيمُ لَهُمْ يَوْمَ الْقِيَامَةِ وَزْنًا ﴿١٠٥﴾)
ئه‌ڤه ژ به‌ر كو هنگى ئه‌و تشت نامینت یێ ئه‌ڤرۆ بهادارییێ دده‌ته وان:
(يَوْمَ يَرَوْنَ الْمَلَائِكَةَ لَا بُشْرَىٰ يَوْمَئِذٍ لِّلْمُجْرِمِينَ وَيَقُولُونَ حِجْرًا مَّحْجُورًا ﴿٢٢﴾ وَقَدِمْنَا إِلَىٰ مَا عَمِلُوا مِنْ عَمَلٍ فَجَعَلْنَاهُ هَبَاءً مَّنثُورًا ﴿٢٣﴾)
ل وى ده‌مێ هــه‌یـڤـه‌كـا نوى دهه‌لات( )، وگه‌شه سپێده‌یه‌كا دى كارێ خۆ دكر؛ دا تیشكێن خــۆ ب ســـه‌ر عـــه‌ردێ مه یێ حێبه‌تى دا به‌رده‌ت، ل وى ده‌مێ خودایێ مه‌زن ب ڕه‌نگه‌كێ بابه‌تى مه‌زنییا خۆ، دئێته عه‌سمانێ دنیایێ، دا ده‌ستێ خۆ بۆ به‌نییێن خۆ ڤه‌كه‌ت، وبێژته وان: كى هه‌یه داخوازه‌كێ بۆ خۆ ژ من بكه‌ت دا ئه‌ز داخوازا وى بۆ وى ب جهـ بینم.
ئه‌ز ل جهه‌كێ نێزیك ژ مینبه‌را پێغه‌مبه‌رێ خۆشتڤى یێ ڕوینشتى بووم، ومن بیرییا وى زه‌مانى دكر ده‌مێ هێشتا ئه‌ڤ جهه یێ (موته‌واضع)، ودویر ژ وان نه‌خش ونیگارێن بیرا مرۆڤى ل خه‌ملا دنیایێ دئینته‌ڤه، ودلـى ب جــوانییا (مـه‌جازى) یا سـه‌رڤـه سـه‌رڤه -وه‌كى شێخێن مه یێن زاهد ناڤ لێ دكر- گرێ دده‌ت، ده‌مێ كۆمه‌كا هلبژارتى ژ جیلێ نموونه‌یێ د دیرۆكا مرۆڤینییێ دا، كو جیلێ صه‌حابییێن پێغه‌مبه‌رى بوو -سلاڤ لێ بن- ل ڤى جهى، دهاتن ودچوون، و ل دۆر ڕێبه‌رێ خۆ یێ خـۆشتـڤى كۆم دبوون، و د فه‌رمانا وى دا ڕادوه‌ستیان، بـێــى كــو دودلـى ڕێكا خۆ ل نك وان بـبـیـنـت، یـان دنیایێ باره‌ك د ژیانا وان دا هه‌بت..
من ئه‌و ب چاڤێ خه‌یالا خۆ ددیتن، ئه‌و خه‌یالا ئاسته‌نگێن ده‌م وجهى ده‌رباس دكه‌ت، وخۆ د سه‌ر سال وزه‌مانێن درێژ ڕا دهاڤێت.. من ئه‌و دیتن هنده‌ك كه‌س، ئه‌گه‌ر ته ئه‌و ب وێ ته‌رازییێ كێشابان، یا خه‌لكێ دنیایێ ل هه‌مى زه‌مانان مرۆڤان پێ دكیشن، دا بینى وان چو سه‌نگا خۆ نینه، به‌لێ ئه‌گه‌ر ته ئه‌و ب ته‌رازییا دورست كێشابان، دا بینى پییێن ئێكێ ژ هه‌مییان له‌غه‌رتر ژ وان -د ســه‌نـگــا خـــۆ دا- گه‌له‌ك ژ چیایێ ئوحودێ دگرانترن، وه‌كى پێغه‌مبه‌رى -سلاڤ لێ بن- د گۆتنه‌كا خۆ دا پییێن عه‌بدللاهێ كوڕێ مه‌سعوودى سه‌نگاندین( )، ڤێجا هوین چ دبێژن بۆ هنده‌كێن وه‌كى ئه‌بووبه‌كر وعومه‌رى؟
ل ڤى ده‌مى.. ل سحارا دلشادییێ، و ل ڤى جهى.. ل مێرگا خۆشتڤییێ دلى، من خه‌یالا وان كه‌سان كر ئه‌وێن بۆ دیرۆكێ بووینه شاهد كو:
* سه‌نگا مرۆڤى نه ب هندێیه كانێ وى چه‌ند هه‌یه، به‌لكى ب هندێیه كانێ وى چه‌ند دایه.
* وكو هه‌ر كه‌سه‌كێ سه‌رێ خۆ بۆ خودێ ب تنێ -نه كو بۆ دنیایێ- بچه‌مینت، خودێ سه‌رێن مه‌زن دێ بۆ وى چه‌مینت.
ل ڤى جهى.. هنده‌ك مرۆڤ ل سه‌ر ده‌ستێ پێغه‌مبه‌رى هاتبوونه په‌روه‌رده‌كرن، ئێك ژ وان د سه‌نگ ومه‌زنى وهممه‌تا خۆ دا ب ده‌هان، یان سه‌دان، یان هزاران بوو، وه‌كى خودێ ب خۆ د قورئانا خۆ دا شاهده‌یى بۆ داى.. وئه‌ڤرۆ -ل زه‌مانێ هیڤى تێدا لاواز بووین، وئارمانج بژاله بووین- مه چه‌ند هه‌وجه‌یى ب هندێ هه‌یه كو ئه‌م بیرا خۆ ل ئه‌وێن هه بینینه ڤه یێن سه‌نگا خۆ ل نك خودێ هه‌ى، وپسیار بكه‌ین:
ئه‌رێ ئه‌و چ تشت بوو سه‌نگا ئه‌وێن هه هنده ل نك خودێ گران كرى؟
وچاوا ئه‌م دێ شێین خۆ ب كاروانێ وان كه‌سان ڕا گه‌هینین یێن سه‌نگه‌كا گران ل نك خودێ هه‌ى؟
ئه‌ڤه دێ بابه‌تێ ڤى نڤیسینا مه بت، ئه‌گه‌ر خودێ حه‌ز بكه‌ت
کومــێتــدان لسـه‌ر بابــه تـی