ده‌سپێك
ده‌سپێك
حه‌مد وسوپاسى بۆ خودێ بن، خودایێ عه‌رد وعه‌سمانى وهه‌مى چێكرییان، مرۆڤ ئافراند، وعه‌قل دایێ، وڕێكا ڕاست نیشا دا، وبه‌رێ وى دایـێ. وصه‌لات وسه‌لامێن تمام ل پێغه‌مبه‌رێ وى بن، ئه‌وێ ب هیدایه‌تێ ودینێ ئاشكه‌را هاتى، و ل هه‌ڤال وهۆگرێن وى یێن سه‌رڕاست وڕێ دورست ژى، وهه‌ر ئێكێ ل سه‌ر ڕێكا وان بچت حه‌تا ڕۆژا قیامه‌تێ.
خوانده‌ڤانێن بهاگران: گه‌له‌ك جاران كارتێكرنا چیرۆك وسه‌رهاتییان د ناڤ وه‌عظى ڕا پتر ومه‌زنتر لێ دئێت ژ هه‌ر تشته‌كێ دى؛ چونكى سه‌رهاتى جهئینانه‌كا عه‌ملى وبه‌رچاڤه بۆ وان (میثالییات) وئه‌خلاقێ چاك یێ خودێ وپێغه‌مبه‌ر وچاكان خه‌لك بۆ داخوازكرى، ئه‌و میثالییاتێن ڕه‌نگه هنده‌ك جاران ل به‌ر هنده‌ك كه‌سان ببنه ئه‌و داخوازێن ڕێنموونه‌یى وخه‌یالى یێن نه‌ئێنه ب جهئینان -وه‌كى ئه‌و هزر دكه‌ن-، به‌لێ ده‌مێ نموونه د واقعى دا چێ دبت، وهنده‌ك مرۆڤێن وان میثالییاتان د ژینا خۆ دا ب كاردئینن، په‌یدا دبن، هنگى بۆ هه‌ر لایه‌كى ئاشكه‌را دبت كو مرۆڤ ئه‌گه‌ر خودێ ته‌وفیقا وى بده‌ت، وئه‌و یێ خودان ئیراده‌یه‌كا ب هێز بت، دێ شێت خۆ ژ پێبه‌ستا عه‌ردى ڕزگار كه‌ت، وسه‌رفه‌راز به‌ر ب عه‌سمانى ڤه بلند بت، هه‌ر وه‌سا دێ ئاشكه‌را بت كو د ناڤ مرۆڤان دا هنده‌ك كه‌س هه‌نه خودێ تبیعه‌تێ ڕۆنـاهـییێ د وان دا په‌یدا دكه‌ت: تشتێ ل ده‌ور وبه‌رێن خۆ گه‌ش دكه‌ت، وه‌كى ب چاڤ دئێته دیتن، وكـارى ل وى تشتى ژى دكه‌ت یێ ل ده‌ور وبه‌رێن وى هه‌ى بێى ب چاڤ بێته دیتن، ب سه‌ر ڤه جوانى ومفا تێدا هه‌یه، و ژ بن ڤه هێز وژین تێدا هه‌یه.. ئه‌و مرۆڤ ئه‌ون یێن ئه‌م دبێژینێ: مرۆڤێن خودێ، یان چاك ووه‌لى.
ومرۆڤ ب تبیعه‌تێ خۆ پتر ژ گوهدانا وه‌عظ ونصیحه‌تان حه‌ز ژ گوهدانا چـیرۆك وسه‌رهاتییان دكه‌ت؛ چونكى ئه‌و (ئستعلاء) وخۆ بلندكرنا شیره‌ت ونصیحه‌ت ل نك شیره‌تكارى په‌یدا دكه‌ت، چیرۆك ل نك چیرۆكڤانى په‌یدا ناكه‌ت، له‌و دبت وه‌رگر گه‌له‌ك جاران وان شیره‌تان یێن چیرۆكڤان ب ڕه‌نگه‌كێ نه ئێكسه‌ر پێشكێشى وى دكه‌ت پتر و ب دله‌كێ خۆشتر وه‌رگرت.
وئه‌ڤرۆ ده‌ورێ چیرۆك وسه‌رهاتییان د لایێ په‌روه‌رده وفێركرنێ دا تشته‌كێ زێده ئاشكه‌رایه، وئه‌و ل نك په‌روه‌ده‌كاران یا بوویه ئێك ژ گرنگترین ڕێكێن مفاگه‌هاندنێ، یێن كو پێتڤییه پویته‌یه‌كێ مه‌زن پێ بێته‌كرن.
وقورئانا پیرۆز -كو د ئه‌صل دا هاتییه دا ئوممه‌ته‌كێ په‌روه‌رده بكه‌ت-، هه‌ر وه‌سا سوننه‌تا پێغه‌مبه‌رى ژى -سلاڤ لێ بن- گه‌له‌ك گرنگى دایه لایێ ڤه‌گێڕانا سه‌رهاتییان، ژ به‌ر وان ده‌رس وعیبره‌تێن مه‌زن یێن ژێ دئێنه وه‌رگرتن.. وتشتێ به‌رچاڤ د وان سه‌رهاتییان دا یێن قورئان وسوننه‌ت بۆ مه ڤه‌دگێڕن ئه‌وه، هژماره‌كا نه یا كێم ژ ڤان سه‌رهاتییان بۆ مه دئێنه ڤه‌گێڕان، بێى ناڤێن وان مرۆڤان بێنه ئاشكه‌ران یێن بووینه كه‌سێن سه‌ره‌كى د گێڕانا ڕویدانان دا، وبێى ده‌م وجهێ وان ژى بوو مه بێنه دیاركرن.. ئه‌ڤه وبێى سه‌رهاتى هنده‌كێ ژ تاما خۆ ژ ده‌ست بده‌ن، یان كێماسیه‌ك بگه‌هتێ، تشتێ هندێ دگه‌هینت كو یا گرنگ د ڤان سه‌رهاتییان دا ڕویدان وده‌رس وعیبره‌تن، وچو ددى نه!
و د ڤێ كتێبا ل به‌ر ده‌ست دا هژماره‌كا سه‌رهاتییێن كیتابێ وسوننه‌تێ مه به‌رهه‌ڤكرینه، وه‌ك تمامكه‌ر بۆ كتێبا مه یا بۆرى (سه‌رهاتییێن پێغه‌مبه‌ران)، بۆ هندێ دا مفا ژێ بێته دیتن، وهیڤییا مه ژ خودایێ مه‌زن ئه‌وه ئه‌و ڤى كارى بۆ به‌رهه‌ڤكه‌رى ب خێر بنڤیست، وبكه‌ته جهێ مفاى بۆ خوانده‌ڤانى..
وخودێ هاریكارێ مه بت.
دهۆك 21 خزیرانا 2009
کومــێتــدان لسـه‌ر بابــه تـی