ئهو زهلامێ خودێ سهد سالان مراندى
ئهو زهلامێ خودێ سهد سالان مراندى
تــشــتێ ژ ههمیان عهجێبتر د باوهریێ دا ل بهر مرۆڤان ههر ژ دهسپێكا ههبوونا مرۆڤان ل سهر ڕویێ عهردى، دوباره زێندیكرنا مرۆڤانه پشتى ئهو دمرن، ولهشێن وان دڕزن ودحهلیێن، وههستیكێن وان ژى ب بۆرینا سال ودهمان پێتى دبن، ودبنه خولى.. لهو گهلهك جاران مرۆڤان حهتا خودان باوهران ژى، بهلكى خۆ هندهك پێغهمبهران ژى، ب حێبهتى ڤه پسیار كرییه: چاوا مرۆڤ پشتى دمرت جارهكا دى دێ وهكى بهرێ لێ ئێتهڤه؟
هــنـــدهك ژ وان ژ بـــێ بــاوهرى و ب (ئینكار) ڤه ئهڤ پسیاره دكر، وهندهكان باوهرى ب شیانا خودێ ل سهر ڤى كارى ههبوو ژى، بهلێ باوهریهكا (نهظهرى)، لهو وان دڤیا باوهریا وان ببته تشتهكێ (عهمهلى) وئهو ب چاڤ ڤێ چهندێ ببینن، یهعنى:
وان دڤیا باوهریا وان ژ دهرهجا (علم الیقین) بهر ب دهرهجا (عین الیقین) ڤه بلند ببت، لهو وان ئهڤ پسیاره دكر..
ئیبراهیم پێغهمبهرى -سلاڤ لێ بن- دهمێ داخواز ژ خودێ كرى ئهو نیشا وى بدهت كانێ چاوا ئهو مریان زێندى دكهتهڤه، خودێ گۆتێ: (قَالَ أَوَلَمْ تُؤْمِنْ ۖ)ما ته باوهرى ب شیانا من ل سهر زێندیكرنا مریان نهئینایه؟ وى گۆت: (بَلَىٰ وَلَٰكِنْ لِيَطْمَئِنَّ قَلْبِي ۖ) بهلێ، من باوهرى ئینایه، بهس دا دلێ من رحهت ببت! چونكى تشتێ مرۆڤ ب چاڤ ببینت وباوهریێ پێ بینت، نه وهكى وى تشتییه یێ مرۆڤى باوهرى پێ ئیناى بێى ب چاڤ ببینت.
ووهك نیشان وئایهتهكا بهرچاڤ بۆ شیانا خودێ ل سهر زێندیكرنا مریان، قورئان سهرهاتییهكێ ژ دیرۆكێ بۆ مه ڤهدگوهێزت، هندی دگههینت كو ئهڤ كارێ مهزن ل بهر مرۆڤان، یێ كو ئهو ب حێبهتى ڤه بهرێ خۆ ددهنێ، ل بهر خودێ گهلهك یێ ب ساناهیه، وئهو خودایێ شیاى ل سهرى مرۆڤى ژ چونهیێ بدهت وبكهته مرۆڤهكێ دورست وپێكهاتى، ل بهر وى یا ب زهحمهت نینه ئهو وى جارهكا دى ژ ههستیكهكێ پێتى بدهت ودوباره وى بكهته مرۆڤهكێ تمام.
وئهڤ سهرهاتییه سهرهاتییا وى زهلامیه یێ خودێ ئهو سهد سالان مراندى، پاشى جارهكا دى زێندى كرییهڤه؛ دا ئهو وى بۆ خهلكێ وى زهمانى بكهته نیشانهكا بهرچاڤ ل سهر شیانا خودێ..
سهرهاتى وهكى د قورئانێ دا هاتى:
د ئایهتهكا ب تنێ دا ژ قورئانێ سهرهاتییا ڤى زهلامى بۆ مه هاتییه ڤهگێڕان، ئهو ژى ئایهتا (259)یه ژ سوورهتا (البقرة)، د ڤێ ئایهتێ دا خودایێ مهزن دبێژت:( أَوْ كَالَّذِي مَرَّ عَلَىٰ قَرْيَةٍ وَهِيَ خَاوِيَةٌ عَلَىٰ عُرُوشِهَا قَالَ أَنَّىٰ يُحْيِي هَٰذِهِ اللَّهُ بَعْدَ مَوْتِهَا ۖ فَأَمَاتَهُ اللَّهُ مِائَةَ عَامٍ ثُمَّ بَعَثَهُ ۖ قَالَ كَمْ لَبِثْتَ ۖ قَالَ لَبِثْتُ يَوْمًا أَوْ بَعْضَ يَوْمٍ ۖ قَالَ بَلْ لَبِثْتَ مِائَةَ عَامٍ فَانْظُرْ إِلَىٰ طَعَامِكَ وَشَرَابِكَ لَمْ يَتَسَنَّهْ ۖ وَانْظُرْ إِلَىٰ حِمَارِكَ وَلِنَجْعَلَكَ آيَةً لِلنَّاسِ ۖ وَانْظُرْ إِلَى الْعِظَامِ كَيْفَ نُنْشِزُهَا ثُمَّ نَكْسُوهَا لَحْمًا ۚ فَلَمَّا تَبَيَّنَ لَهُ قَالَ أَعْلَمُ أَنَّ اللَّهَ عَلَىٰ كُلِّ شَيْءٍ قَدِيرٌ 259 ) ومهعنا ڤێ ئایهتێ ب كورتى ئهڤهیه، خودێ دبێژت: یان ته -ئهى موحهممهد- ئێكێ وهكى وى زهلامى ديتیه، وسهرهاتییهكا عهجێب یا وهكى وى بهیستیه، يێ د بهر كاڤله باژێڕهكى ڕا بۆرى (وبۆ زانین: قورئان پهیڤا گوند (قریة) بۆ باژێڕى ب كار دئینت)، ئهو باژێڕ يێ ههرفتى بوو، وژیان لێ نهمابوو، دهمێ وى باژێڕ ب وى ڕهنگى دیتى گۆت: پشتى ئهڤ گونده مرى، چاوا خودێ جارهكا دى دێ وى ساخ كهتهڤه؟
هنگى ودا خودێ بۆ وى بهرچاڤ بكهت كانێ چاوا خودێ تشتێ مرى زێندى دكهتهڤه، خودێ سهد سالان ئهو مراند، پاشى ڕحا وى لێ زڤڕاندهڤه، وقاصدهك (ملیاتهتهك) فڕێكره نك وى؛ دا پسيارێ ژێ بكهت: كانێ ئهڤه چهند ساله ئهو مرى مايه ل ڤى جهى؟
وى بهرسڤ دا وى قاصدى وگۆت: ئهڤه ڕۆژهكه يان دا نهبته درهو ئهڤه دانهكێ ڕۆژێیه، ئـهزێ مـايـمـه ل ڤێرێ! قاصدى گۆتێ: نه نه.. ئهڤه سهد ساله ئهو مایه ل ڤێڕێ. گۆتنهكا غهریب بوو ل بهر وى، سهد سال! ئهڤه چاوا دێ چێ بت؟ وبهرى ئهو پسیارا نیشانهكێ ل سهر ڕاستییا گۆتنا وى بكهت، قاصدێ خودێ گۆتێ: كانێ ل سهرى بهرێ خۆ بدهته وێ خوارن وڤهخوارنا ته د گهل خۆ ئیناى، ئهو هێشتا وهكى خۆیه، خراب نهبوویه، وخودێ ل ڤى دهمێ درێژ -كو سهد سالن- ئهو ژ ههمى گوهۆڕين وخراببوونان پاراستیه، وى بهرێ خۆ دایێ.. وهسا بوو وهكى وى گۆتى.
پاشى گۆتێ: دێ ڤێجا نوكه بهرێ خۆ بدهته كهرێ خۆ، وى بهرێ خۆ دایێ.. ئهو كۆمهكا ههستییانه، ئهڤه چیه؟ تشتهكێ بهرعهقل نینه ئهڤ كاره د ڕۆژهكێ دا یان ددانهكى دا چێ ببت، مهعنا ئهڤ گۆتنه ڕاسته یا ئهو دبێژت، قاصدى گۆتێ: ئهڤه سهد ساله ئهو ژى وهكى ته مرى، كانێ بهرێ خۆ بدێ چاوا خودێ دێ وى زێندى كهتهڤه پشتى ئهو بوويه كۆمهكا ههستیكێن پێتى وبژاله؟
وى بهرێ خۆ دایێ ههستیكان خۆ لێك دا، وگۆشت وچهرم ب سهر دا هات، وكهرێ وى وهكى بهرێ لێ هاتهڤه، وخودێ ل سهر ئهزمانێ قاصدى گۆتێ: ودا ئهم ته وسهرهاتییا ته یا عنتیكه بۆ مرۆڤان بكهينه ئايهت، یهعنى: نيشانهكا ئاشكهرا ل سهر شيانا خودێ یا بێ توخویب وكو ئهو دشێت مریان زێندى بكهتهڤه، وگاڤا ڤى زهلامى دهرس وهرگرتى، جارهكا دى فهرمان لێ هاتهكرن كو ئهو بهرێ خۆ بدهته ههستیكان كانێ چاوا خودێ وى لێكددهت، ودگههينته ئێك، پاشى گۆشتى د سهر دا دگرت، پاشى جارهكا دى ژينێ دكهته تێدا؟
وگـاڤـا وى ئـهڤ چـهنــده ب چـاڤ ديـتــى، وبـاوهریا وى ب ژینا پشتى مرنێ ژ (علم الیقین) گههشتیه (عین الیقین) وى ئعتراف ب مهزنییا خودێ كر، وگۆت: ئهز دزانم كو خودێ ل سهر ههر تشتهكى يێ خودان شيانه!
ئهز دزانم؟!
پا مهعنا پسیارا وى یا بهرى هنگى چ بوو دهمێ وى گۆتى: چاوا خودێ ڤى باژێڕى، یهعنى: خهلكێ ڤى باژێڕى، جارهكا دى دێ زێندى كهت؟
مهعنا وێ ئهو نهبوو وى باوهرى ب ڤێ چهندێ نهبوو، وى باوهرى ههبوو، وئهو زهلامهكێ خودێناس بوو، وچو جاران ئهو د شیانا خودێ دا ل سهر كرنا ههر تـشـتـهكـێ هـهبـت، نهكهفتبوو گومانێ، بهلێ وى حهز دكر ئهو ڤى كارێ غهریب ب چاڤ ببینت، وئهڤه وى دیت.
وهكى -بۆ نموونه- دهمێ ئێك ژ مه كهڤالهكێ هۆنهرى یێ زیده جوان دبینت، ژ لایێ هۆنهرمهندهكى ڤه دئێته نهخشاندن، ئهو دزانت سهدا سهد ڤى هۆنهرمهندى ئهڤ كهڤاله یێ نهخشاندى، بهلێ هندى هند ئهو یێ پێ موعجبه، دێ بێژته هۆنهرمهندى: كانێ نیشا من بده چاوا ته ئهڤ ڕهنگه تێكهلى ئێك كرینه، وچاوا تو شیاى كهڤالێ خۆ ب ڤى ڕهنگى دورست بكهى؟
مهعنا هنگى تو نه دهلیلهكى ژێ داخواز دكهى ڕاستییا ڕابوونا وى ب ڤى كـارى ئاشكهرا بكهت، بـهلكى تو داخوازێ ژێ دكهى ئهو (چاوانییا) ڕابوونا وى ب ڤى كارى بۆ ته ئاشكهرا بكهت، وئهڤ پسیاره ژ ته نیشانا باوهرى ئینانا تهیه ب كارێ وى نه كو ته باوهرى پێ نینه كو ئهو شیایه ڤى كارى بكهت.
ئهڤ ڕهنگێ پسیارێ نیشانا باوهریێیه، لهو ڤى زهلامى گۆت: ئهز دزانم كو خودێ ل سهر ههر تشتهكى يێ خودان شيانه!
ئهو زهلام كى بوو؟
قورئانێ نهگۆتیه مه ئهو زهلام كى بوو، ناڤێ وى بۆ مه ئاشكهرا نهكرییه، وناڤێ وى باژێڕێ ئهو د بهر ڕا چووى ژى بۆ مه دیار نهكرییه.. بهلێ بۆ مه ههیه ئهم پسیارهكێ بكهین:
- ئهڤ زهلامه وهكی بۆ مه ژ ئایهتێ دیار دبت یێ ب تنێ بوو، وئهو باژێڕێ ئهو د بهر ڕا چووى ژى باژێڕهكێ ڤالا بوو ژ مرۆڤان، كهس لێ نهبوو، و د گهل هندێ ژى خودێ دبێژتێ: مه ئهڤا هه د گهل ته كر دا تو بۆ مرۆڤان ببیه ئایهت..
وهكى عیسا پێغهمبهرى دهمێ خودێ ئهو بێ باب دایه مهریهمێ گۆتێ: دا ئهم وى بۆ مرۆڤان بكهینه ئایهت ل سهر شیانا خۆ.
وعیسا ئسرائیلییان ههمیان ئهو دیت، بهلێ ئهڤ زهلامه دهمێ خودێ دبێژتێ: دا ئهم ته بۆ مرۆڤان بكهینه ئایهت؟ بۆ مه ههیه پسیار بكهین:
- كیژ مرۆڤان؟
- ئهرێ ما مرۆڤهك ل وێرێ ههبوو وى ببینت، دا ئهو بۆ ببته نیشان؟
ژ سیاقێ ئایهتێ ئاشكهرا دبت كو: نه.. پا بۆ كێ ئهو بووبوو ئایهت؟
تهفسیرزانان د دهر حهقان دهسنیشانكرنا كهسینییا ڤى زهلامى دا دو سێ بۆچوون ههنه، هندهك دبێژن: ئهو زهلام (خضر) بوو، ئهوێ ل زهمانێ مووسا پێغهمبهرى -سلاڤ لێ بن- ژیاى، وخودانێن ڤێ بۆچوونێ ئاشكهرا ناكهن كانێ ئهو باژێڕێ خضر د بهر ڕا چووى چ باژێڕ بوو.
وهندهكێن دى دبێژن: ئهو ئرمیایێ پێغهمبهر بوو، ئهوێ خودێ بۆ ئسرائیلییان هنارتى دهمێ ڕووگهها وان یا پیرۆز (ئۆروشهلیم) ب دهستێن نهیارێن وان هاتییه وێرانكرن، وشاهێ بابل (نهبوخهذنهصصهرى) ل سهدسالا شهشێ بهرى زایینى مهملهكهتا وان یا باشوور (یههووذا) پهلخاندى، وگهلهك ژ وان كوشتین وگهلهك ب ئێخسیرى گرتین وبرینه پایتهختا خۆ ل (بابلێ).. هنگى پشتى باژێڕێ بهیتولمهقدسێ (ئۆروشهلیم) هاتییه وێرانكرن وڕاستكرن ب عـــهردى ڤــه، وكهسهكێ خودان رح لێ نهماى، ئرمیا پێغهمبهر د بهر ڕا چوو، و ب خهم وكۆڤان ڤه گۆت: چاوا خودێ جارهكا دى ڤى باژێڕى دێ ساخ كهتهڤه، ومرۆڤ دێ لێ ژین؟!
وبۆچوونا سیێ ئهوه یا هندهك زانایێن دى دبێژن كو ئهڤ زهلامه ئهوه یێ دبێژنێ: (عوزهیر)(د پهرتووكا پیرۆزا ئسرائیلییان دا كتێبهك ب ناڤێ (عهزراى) ههیه، وعهزرا پێغهمبهرهكێ وان بوو، پشتى خرابكرنا بهیتولمهقدسێ هاتبوو، و ل سهر دهمێ وى جوهى ژ بابل زڤڕینه بهیتولمهقدسێ وجارهكا دى ئهو ئاڤاكر، پشتى حهفتێ سالان ژ ئێخسیریێ، وئهز دویر نابینم (عزرا) و (عوزهیر) ئێك ناڤ بن.. وئهوێ زانایێن مه دبێژنێ: عوزهیر، ههر ئهو بت یێ زانایێن جوهیان دگۆتێ: عهزرا.. وڤێ مهسهلێ هێشتا دویچوون پێ دڤێت.) ئهوێ ناڤێ وى د هندهك جهێن دى یێن قورئانێ دا هاتى، وخودێ تان ل جوهیان داى كو ئهو (یان هندهك ژ وان) دبێژن: عوزهیر كوڕێ خودێیه، كانێ چاوا فهله دبێژن:
عیسا كوڕێ خودێیه! زانایێن تهفسیرێ دبێژن: ئهڤ زهلامه ئهوێ ناڤێ وى عوزهیر، ئێك ژ مێرچاكێن ئسرائیلییان بوو، (وئهگهر ئهم بێژین ئهو عهزرایه، ئهو ل دویڤ بۆچوونا تهوراتێ ئێك ژ پێغهمبهرێن ئسرائیلییان بوو) دهمێ ژیێ وى ل نێزیكى چل سالیێ، جارهكێ ژ مالا خۆ دهركهفت، ل كهرێ خۆ یێ سویار بوو، ومێدهكا وى یا خوارنێ د گهل دا بوو، وئنیهتا وى ئهو بوو قهستا ناڤ بیستانێ خۆ بكهت، و د ڕێكا خۆ دا ئهو د بهر باژێڕێ پیرۆزێ بهیتولمهقدسێ ڕا بۆرى، وئهو باژێڕ هنگى یێ وێرانكرى بوو، تشتهكێ خودان رح لێ نهبوو، (وكتێبێن دیرۆكێ دبێژن: ل سالا 586 بهرى زایینێ باژێڕێ بهیتولمهقدس ب دهستێن نهبووخهذنهصصهرێ بابلى هاتـــبـــوو وێــــرانــكــرن)، گاڤا وى باژێڕ ب ڤى ڕهنگى دیتى، وى ب حێبهتى ڤه پسیار كر: چاوا خودێ ڤى باژێڕێ مرى جارهكا دى دێ زێندى كهته ڤه، وتژى كهت ژ مرۆڤان پشتى ئهو كاڤل بووى؟
هنگى ئهڤ سهرهاتییه ب سهرى هات یا بهرى نوكه مه ڤهگێڕاى، (وكتێبێن دیرۆكێ دبێژن: باژێڕێ بهیتولمهقدسێ حهفتێ سالان پشتى خرابكرنێ كاڤل بووبوو، ژ سالا 568-516 بهرى زایینێ، و ل سالا 458 ب.ز عهزرا پێغهمبهر زڤـڕیـبـوو بهیتولمهقدسێ وئــهو هــنــگـى یــا ئـاڤـابــوو، یهعنى پشتى 110 سالان ژ خرابكرنا وێ) و ل دویڤ سهرهاتییێ وهكى د قورئانێ دا هاتى، ئهڤ زهلامه سهد سالان ما نڤستى (یان مراندن) پاشى گاڤا ئهو هشیار بووى، ب وى ڕهنگێ موعجیزه یێ مه ڤهگێڕاى، بهرێ خۆ دایێ تشتهك ل وى نههاتییه گوهاڕتن، جهـ ژى ههر وهكى خۆیه، لهو دهمێ پسیار ژێ هاتییهكرن: ئهڤه چهنده تو ل ڤێرێ؟ وى هزر كر ئهو بیست خهبهرهكان یێ نڤستى، لهو گۆت: ئهڤه ڕۆژهكه یان دانهكه!! وپشتى وى ههستیكێن كهرێ خۆ دیتین، ئهو د گۆتنا خۆ دا كهفته گومانێ وپشتى قاصدى گومانا وى ب (یهقینێ) بڕى، وگۆتییێ: ئهڤه سهد ساله تو ل ڤى جهى، وئهوا هاتییه سهرێ ته موعجیزهیهك بوو ژ خودێ دا تو بۆ خهلكى ببیه نیشان ل سهر شیانا خودی یا بێ توخویب ل سهر ساخكرنا مریان، وى هزرا زڤڕینێ بۆ مالا خۆ كر..
و ل دهمێ زڤڕینێ ئهو جارهكا دى د بهر باژێڕێ بهیتولمهقدسێ ڕا بۆرى، ئهڤه چیه؟ ئهڤه كیژ باژێڕه ل ڤێرێ؟ پاشى موعجیزه هاته بیرێ، ئاخری ئهڤه سهد ساله ئهو نڤستى، وئهڤه ئهو باژێڕه ئاڤابوویه ڤه یێ وى بهرى بێنهكێ (یان بهرى سهد سالان!) حێبهتییا خۆ ئاشكهرا كرى كانێ چاوا خودێ جارهكا دى دێ وى ساخ كهته ڤه، نوكه ئهو یێ تژى مرۆڤه.. وههیكهلێ پیرۆز جارهكا دى ل نیڤا باژێڕى یێ سهربلنده، بهلێ بهرى ئهو بچته باژێرى، كانێ دا بزڤڕته مالا خۆ، ل گوندێ خۆ، كانێ مرۆڤێن وى ب حالن؟!
چیرۆكڤان دبێژن: گاڤا عوزهیر گههشتیه ناڤ مالان، وى دیت ههر تشتهك یێ هاتییه گوهاڕتن، بهلێ ب هندهك نیشانان ئهو شیا ب وى لایى دا بچت یێ مالا وى لێ، خانى.. مرۆڤ.. سهروبهر.. ههمى هاتبوونه گوهاڕتن، ل بهر دهرێ وێ مـالـێ یـا وى شـك بـریـن كـو مـالا ویـیـه، وى پیرهژنهك دیت یا ڕوینشتى بوو، ژ سهروبهرێ دهاته زانین كو ئهو یا كۆرهیه، پشتى عوزهیرى سالاڤ كرى، پسیار كر:
- ئهرێ پا ئهڤه نه مالا عوزهیریه؟
پیرهژنێ ئهڤ پسیاره ب غهریبى ڤه وهرگرت، عوزهیر؟! ئهڤه سهد ساله خهلكى ئهڤ ناڤه ژ بیركرى، ژ نوى تو پسیارا عوزهیرى دكهى؟!
عوزهیرى تێ ئینادهر كو ئهو ژ پسیارا وى یا مهندههۆشه، بهلێ مهندههۆشیا وێ هێشتا زێدهتر لێ هات دهمێ وى گۆتییێ:
- ئهز عوزهیرم!
پیرێ گۆتێ:
- ما كهسهك نهمایه تو تڕانهیێن خۆ پێ بكهى ژ من پێڤهتر؟ عوزهیر ئهڤه سهد ساله چووى، ونه زڤڕى.. وكهس نزانت ئهو ب كیژ سهروشوینان دا چوویه، پشتى هنگى ئهگهر تو عوزهیر ژى باى نوكه تو گهلهك ژ من پیرتر لێ هاتبووى، بهلێ ژ دهنگێ ته یێ دیاره كو هێشتا تو یێ جحێلى، ههڕه بهلا خۆ ژ من ڤهكه!!
وگاڤا پیرێ (ئیلحاحا) وى دیتى، ووى سهرهاتییا خۆ ب كورتى بۆ وێ ڤهگێڕاى، وێ گۆتێ:
- باشه، عوزهیر مرۆڤهكێ پیرۆز بوو، وههر دوعایهكا وى كربا خودێ ئێكسهر قهبویل دكر، ئهگهر تو عوزهیر بى دوعایهكێ بۆ من بكه كو خودێ چاڤێن من روهن بكهت؛ دا ئهز ته ببینم، وئهگهر توعوزهیر بى ئهزدێ ته نییاسم، چونكى من ل زارۆكینییا خۆ عوزهیر دیتبوو..
عوزهیرى دوعایهك بۆ كر، وخودێ چاڤێن وێ روهن كرن، وێ عوزهیر دیت ونییاسى، وچو مزگینى دا مالا وى، وهنگى نهڤیێن عوزهیرى گههشتبوونه عهمرێ پیراتییێ، ئێك ژ مالا عوزهیرى گۆت:
- دبێژن: نیشانهكا هۆسا ب ناڤ ملێن عوزهیرى ڤه ههبوو، كانێ ناڤ ملێن خۆ نیشا مه بده دا بۆ مه مسۆگهر ببت كو تو عوزهیرى..
وپشتى بۆ وان چو گومان ل نك وان نهماى كو ئهو عوزهیره، مهزنێن ئسرائیلییان یێن وى سهردهمى گۆتێ:
- دهمێ نهیارێن مه ژ بابلیان هاتین ووهلاتێ مه وێران كرى، وزانایێن مه كوشتین وگرتین، دانهیێن كیتابا مه یا پیرۆز ههمى سۆتن وپویچكرن، دبێژن: عوزهیر ئێك ژ وان بوو یێن تهورات ههمى ژ بهر، ڤێجا ئهگهر ڕاسته تو عوزهیرى جارهكا دى تهوراتێ بۆ مه بێژه؛ دا ئهم وێ بنڤیسین..
گاڤا وى تهورات ژى ههمى بۆ وان ڤهگێڕاى، وان ژ نوى ب دورستى باوهرى پێ ئینا وگوهداریا وى كر.. بهلێ ژ بهر ڤێ سهرهاتییا وى یا غهریب ونهعهدهتى، هندهك ژ نهزان وبێ عهقلێن ئسرائیلییان هنگى (یان پشتى مرنا وى) غولوو وزێدهگاڤى د دهر حهقا وى دا كر، وهندهك ژ وان گۆت: عوزهیر كوڕێ خودێیه، ئهگهر نه..
چاوا ئهڤ چهنده دا د گهل وى ئێته كرن، وئهڤهیه دهمێ قورئان دبێژت: (وَقَالَتِ الْيَهُودُ عُزَيْرٌ ابْنُ اللَّهِ وَقَالَتِ النَّصَارَى الْمَسِيحُ ابْنُ اللَّهِ ۖ ذَٰلِكَ قَوْلُهُمْ بِأَفْوَاهِهِمْ ۖ يُضَاهِئُونَ قَوْلَ الَّذِينَ كَفَرُوا مِنْ قَبْلُ ۚ قَاتَلَهُمُ اللَّهُ ۚ أَنَّىٰ يُؤْفَكُونَ 30)(التوبة: 30).
خودێ یێ پاك وپیرۆز بت ژ شركا وان!
کومــێتــدان لسـهر بابــه تـی