3 ئه‌و ژنكا ئاڤدانا صه‌ى بریه به‌حه‌شتێ
ئه‌و ژنكا ئاڤدانا صه‌ى بریه به‌حه‌شتێ
ئه‌ڤه ژى ئێك ژ وان سه‌رهاتییانه یێن فره‌هیا ره‌حما خودێ بۆ مه به‌رچاڤ دكه‌ت، وهندێ دگه‌هینت كو دبت كاره‌كێ ل به‌ر مرۆڤى یێ كێم بت ل نك خودێ گه‌له‌ك یێ مه‌زن بت، ومرۆڤ پێ بچته به‌حه‌شتێ.
بوخارى وموسلم هه‌ردو ژ ئه‌بوو هوره‌یره‌ى ڤـه‌دگوهێزن دبێژت: پێغه‌مبه‌رى -سلاڤ لێ بن- گۆت: ( غُفِرَ لِامْرَأَةٍ مُومِسَةٍ مَرَّتْ بِكَلْبٍ عَلَى رَأْسِ رَكِيٍّ، يَلْهَثُ، (وفي رواية: قَدْ أَدْلَعَ لِسَانَهُ مِنْ الْعَطَشِ)، كَادَ يَقْتُلُهُ الْعَطَشُ، فَنَزَعَتْ خُفَّهَا، فَأَوْثَقَتْهُ بِخِمَارِهَا، فَنَزَعَتْ لَهُ مِنْ الْمَاءِ، فسقته، فَغُفِرَ لَهَا بِذَلِكَ ).
یه‌عنى: گونه‌هێن ژنه‌كا پویچ (زناكه‌ر) هاتنه ژێبرن، چونكى ئه‌و د به‌ر صه‌یه‌كى ڕا بۆرى ژ تێهنا دا ئه‌زمانێ وى د ده‌ڤى دا هاتبوو، ئینا وێ پێلاڤا خۆ ژ پیێ خۆ كر، وده‌رسۆكا خۆ پێڤه كر، وهنده‌ك ئاڤ بۆ پێ هلكێشا ودایێ، ئینا ژ به‌ر وێ چه‌ندێ گونه‌هـ بۆ وێ هاتنه ژێبرن.
هژماره‌كا ده‌رس ومفایان ژ ڤێ سه‌رهاتییێ دئێنه وه‌رگرتن:
🔘 دڤـێـت نـه‌ئـێـتـه هـزركـرن كو ئه‌و كه‌سێ ژ به‌ر كرنا هنده‌ك گونه‌هان، خۆ ئه‌گه‌ر ئه‌و گونه‌هـ یێن دمه‌زن ژى بت، ژ خودێ دویر كه‌فت بت، دلێ وى ژ ئیمانێ وره‌حمێ یێ ڤالایه، نه‌خێر.. هیڤیێن خۆ دڤێت نه‌بڕین، ووه‌كى د سه‌رهاتییا بۆرى ژى دا مه گۆتى: نابت چو جاران ئه‌م خۆ بێ هیڤى بكه‌ین كو فلان كه‌س موسته‌حیله جاره‌كێ بێته سه‌ر رێ، یان خودێ ره‌حمێ پێ ببه‌ت، ئه‌ڤ ژنا هه ژى وه‌كى زه‌لامێ د سه‌رهاتییا بۆرى دا مه دیتى، ئێك ژ وان كه‌سان بوو یێن ئێك ژ گونه‌هێن مه‌زن (كه‌بائران) دكرن، به‌لێ هێشتا شوینوارێن باوه‌ریێ د دلى دا مابوون.
🔘 دبت هنده‌ك كار هه‌بن ل نك خه‌لكى دبێ بها بن، وئه‌و ب چاڤه‌كێ كێم به‌رێ خۆ بده‌نێ، وئه‌و ب خۆ ئه‌و ل نك خودێ گه‌له‌ك دمه‌زن بن، ئه‌گه‌ر مــرۆڤ ژ بــه‌ر خـودێ وبۆ خودێ وى كارى بكه‌ت، وئێك ژ وان كاران ره‌حــم پــێ بــرنــه، نـه ره‌حم برنا ب مرۆڤان ب تنێ به‌لكى خۆ ره‌حم برنا ب حــه‌یــوانــه‌تـان ژى، پێغه‌مبه‌ر -سلاڤ لێ بن- د گۆتنه‌كا خۆ دا دبێژت: ( الرَّاحِمُونَ يَرْحَمُهُمْ الرَّحْمَنُ، ارْحَمُوا أَهْلَ الْأَرْضِ يَرْحَمْكُمْ مَنْ فِي السَّمَاءِ ).
🔘 ره‌حم برنا ب حه‌یوانه‌تى ئێك ژ وان كارێن باشه یێن خودێ خێره‌كا مه‌زن پێ دده‌ته مرۆڤى، ئه‌گه‌ر هات ووى ئه‌ڤ كاره ب ئنیه‌ته‌كا دورست كر، ڤێ ژنێ د گه‌ل كارێ خرابێ وێ دكر خودێ ره‌حم پێ بر وئه‌و بره به‌حه‌شتێ، چونكى وێ ژى ره‌حم ب صه‌ى بر وئه‌و ژ تێنكاتییێ ڕزگار كر، وبه‌روڤاژى ڤێ چه‌ندێ ئه‌و كه‌سێ ره‌حمێ ب حه‌یوانه‌تى نه‌بت خودێ ژى ره‌حمێ پێ نابه‌ت، ودێ ئێت د گه‌ل مه -د سه‌رهاتییه‌كا بێت دا- كانێ چاوا خودێ ژنه‌ك بره جه‌هنه‌مێ چونكى وێ كتكه‌ك حه‌بس كر، نه چو دایێ، ونه‌هێلا ئه‌و ب خۆ ب ده‌ڤێ خۆ بچه‌رت..
🔘 مرۆڤێ خودان باوه‌ر ب كرنا گونه‌هان -ئه‌گه‌ر خۆ ژ گونه‌هێن مه‌زن ژى بن- كافر نابت، وچێ نابت بۆ كه‌سێ قه‌طع بكه‌ت كو ئه‌و گونه‌هـ خودانى دێ به‌نه جه‌هنه‌مێ، چونكى دبت مرۆڤه‌كێ گونه‌هكار ژ گونه‌ها خۆ تۆبه نه‌كه‌ت ژى به‌لێ هنده‌ك كارێن باش بكه‌ت، و ژ به‌ر وان كارێن باش خودێ گونه‌هێن وى یێن مه‌زن ژێ ببه‌ت، یا گرنگ ئه‌وه ئه‌صلێ ئیمانێ ل نك مرۆڤى هه‌بت، وده‌مێ كاره‌كێ باش دكه‌ت ئنیه‌تا وى یا خێرێ بت، وئارمانجا وى خودێ بت، وئه‌گه‌ر ئه‌و زه‌لامێ سه‌د مرۆڤ كوشتین -وه‌كى د سه‌رهاتییا بــۆرى دا مــه دیــتــى- تۆبه كـربت، یان حه‌زكرنا تۆبێ كه‌فتبته دلى، ڤێ ژنا فاحیشه دكر -وه‌كى د ڤێ سه‌رهاتییێ دا مه دیتى- تـــۆبـــه نــه‌كربوو، به‌لێ ئه‌و ب كرنا باشیێ نه كو ب تۆبه‌كرنێ چوو به‌حه‌شتێ، ڤێجا دڤــێــت دهـشیار بـین وكــه‌ســێ ب كرنا گونه‌هێ كافر نه‌كه‌ین، وحوكمى ب جه‌هنه‌مێ ل سه‌ر نه‌ده‌ین.
🔘 ره‌حم وقه‌نجیا خودێ گه‌له‌ك یا به‌رفره‌هه، وشه‌رت نینه هه‌رده‌م دانا جزایى ل دویڤ كارێ مرۆڤى بت، چونكى دبت هنده‌ك جاران مرۆڤه‌ك كاره‌كێ كێم بكه‌ت به‌لێ خودێ خێره‌كا مه‌زن پێ بده‌تێ، وڕۆژا قیامه‌تێ هنده‌ك تشتێن نه‌ئێنه سه‌ر هزرا مرۆڤى ژ خودێ چێ دبن، وه‌كى د ئایه‌ته‌كێ دا هاتى: (وَبَدَا لَهُمْ مِنَ اللَّهِ مَا لَمْ يَكُونُوا يَحْتَسِبُونَ 47 ) سه‌را كاره‌كێ كێم ل به‌ر مه -كو ئاڤدانا صه‌ى بوو- خودێ ره‌حم ب ڤێ ژنێ بر وبره به‌حه‌شتێ.
🔘 مرۆڤ -هه‌ر مرۆڤه‌كێ هه‌بت- یـێ نـێـزیـكــه ژ بـه‌حـه‌شتێ ویێ نێزیكه ژ جه‌هنه‌مێ ژى، ودبت ئه‌و ب گۆتنه‌كا بچویك یان ب كاره‌كێ كێم -ل به‌ر وى- ئه‌و بچته به‌حه‌شتێ یان جه‌هنه‌مێ، پێغه‌مبه‌ر -سلاڤ لێ بن- دبێژت: ( الجَنَّةُ أَقْرَبُ إِلَى أَحَدِكُمْ مِنْ شِرَاكِ نَعْلِهِ، وَالنَّارُ مِثْلُ ذَلِكَ ) ژ به‌ر ڤێ چه‌ندێ دڤێت مرۆڤ چو جاران ب چاڤه‌كێ كێم به‌رێ خۆ نه‌ده‌ته چو خێران، هه‌ر وه‌سا چو گونه‌هان ژى.. چونكى ئه‌و نزانت كانێ ئه‌و خێر یان ئه‌و گوه‌هـ دێ چو ئینته ڕێكا وى.
🔘 خودێ ئه‌گه‌ر خێرا مرۆڤه‌كى ڤیا دێ به‌رێ وى ده‌ته ڕێكا خێرێ، وته‌وفیقا وى دێ دكه‌ت كو خێرێ بكه‌ت، وه‌كى كو به‌رێ ڤێ ژنێ دایه سه‌ر ده‌رێ ڤێ بیرێ، دا ئه‌و وى صه‌یێ تێهنى ل وێرێ ببینت وئاڤێ بده‌تێ، ودا پشتى هنگى خودێ ژ به‌ر ڤى كارێ وێ ره‌حمێ پێ ببه‌ت.
کومــێتــدان لسـه‌ر بابــه تـی