سه‌رهاتیـیا وان هه‌ر سێ زه‌لامێن ده‌رێ شکه‌فتـێ ڵێ هاتیـیه گرتـن
سه‌رهاتیـیا
وان هه‌ر سێ زه‌لامێن ده‌رێ شکه‌فتـێ ڵێ هاتیـیه گرتـن
وئه‌ڤه ئێك ژ وان سه‌رهاتییانه یێن پێغه‌مبه‌رى ـ سلاڤ لـێ بن ـ ژ ملله‌تێن به‌رى مه بۆ مه ڤه‌گێڕاین بۆ هندێ دا به‌رێ مه بده‌ته ڕێكا ڕزگاربوونێ ل ده‌مێ كو ته‌نگاڤى ب سه‌ر مه دا دئێن .. پێغه‌مبه‌رى ـ سلاڤ لـێ بن ـ ب ڤه‌گێڕینا ڤێ سه‌رهاتییێ دڤیا مـه ل هــنــدێ ئاگــه‌هــدار بـكـه‌ت كو ( ته‌وه‌سسولا ) ب كریارێن باش خودانێ خــۆ ژ تــه‌نـگاڤىیێن دنیایێ ڕزگار دكه‌ت ، وكو كریارێن باش ( وئیخلاص وترسا ژ خـودێ سه‌رێ هه‌مى باشىیانه ) ل دنیایێ به‌رى ئاخره‌تێ مفاى دگه‌هینته خودانێ خۆ .
و ژ ریـوایـه‌تـێـن جودا جودا یێن ڤێ حه‌دیسێ بۆ مه ئاشكه‌را دبت كو ڕه‌نگه پتـر ژ جاره‌كێ پێغه‌مبه‌رى ـ سلاڤ لـێ بن ـ ئه‌ڤ سه‌رهاتییه بۆ صه‌حابییێن خۆ ڤه‌گێڕا بت ، تشتێ گرنگییا ڤێ سه‌رهاتییێ وكارتێكرنا وێ یا باش ل سه‌ر ره‌فتارێ مرۆڤى دگه‌هینت . (پتـر ژ زانايەكى ئەڤ حەديسە ريوايەت كرییە وهژمارەكا جوداهییێن ( شەكلى ) د ناڤبەرا ريوايەتێن وان دا هەنە ، تشتێ هندێ دگەهينت كو پێغەمبەرى ـ سلاڤ لـێ بن ـ پتـر ژ جارەكێ ئەڤ سەرهاتیيە گـوتییە ، ژ وان يێن ئەڤ حەديسە ريوايەت كرى : بوخارى ، موسلم ، ئەحمەد ، بەززار ، طەبەرانى ، ئەبوويەعلا ، وئبـن حببان)
وبه‌رى ئه‌م ڤێ سه‌رهاتییێ ڤه‌گێڕین هێژاى گـۆتنێیه بێژین : ئیمامێ بوخارى پشتى سه‌رهاتییا ( خودانێن شكه‌فتێ ) سه‌رهاتییا ڤان هه‌ر سێ مرۆڤان ڤه‌دگێڕت ، وزانایێ ناڤدار ( ئبـن حه‌جه‌ر ) دبێژت : هه‌ر وه‌كى ئه‌ڤه ئیشاره‌ته‌كه ژ بوخارى بۆ وێ ریوایه‌تێ ئـه‌وا دبێژت مه‌خسه‌د ب په‌یڤا ( الرقیم ) ئه‌وا د ڤێ ئایه‌تێ دا هاتى : ( أم حسبت أن أصحاب الكهف والرقیم .. ) ئه‌ڤ هه‌ر سێ مرۆڤه بوون یێن شكه‌فت لـێ هاتییه گرتن .
ئه‌ڤ هه‌ر سێ زه‌لامه كى بوون ؟
د هه‌مى ریوایه‌تێن ڤێ حه‌دیسێ دا ناڤێن ڤان هه‌ر سێ زه‌لامان نه‌هاتینه ، وبۆ مه ئاشكه‌را نه‌بوویه كانێ ئه‌و خه‌لكێ كیژ وه‌لاتینه ، وكه‌نگى ژیاینه ، ب تنێ ریوایه‌ته‌ك تێ نه‌بت یا ( طەبه‌رانى ) ڤه‌گوهاستى (وزانايێ ناڤدار ( ئبـن حەجەر ) د كتێبا خو ( فتح البارى ) دا ئاشكەرا دكەت كو ئەڤ ريوايەتە يا ضەعيفە ، وئيمامێ بوخارى ڤێ حەديسێ ل بن ڤى بابى دئينت ( باب ما ذكر عن بني إسرائيل ) تشتێ هندێ دگەهينت كو ئەو ژى ل وێ باوەرێ بوويە كو ئەڤ هەر سێ زەلامە ژ مللەتێ ئسرائيلى بووينە ) تێدا هاتییه كو ئه‌ڤ هه‌ر سێ زه‌لامه ئسرائیلى بوون ، وئه‌گه‌ر هات وئه‌و ئسرائیلى بن هزر پـتـر دێ بۆ هندێ چت كو ئه‌و ل وه‌لاتێ شامێ ژیاینه .
هه‌ر سێ زه‌لام ل چۆلـى :
پێغه‌مبه‌ر ـ سلاڤ لـێ بن بۆ مه ئاشكه‌را دكه‌ت كو ڤان هه‌ر سێ زه‌لامان ڕۆژه‌كێ ژڤان دا ئێك ودو كو پێكڤه ده‌ركه‌ڤنه چۆلـى ، چ بۆ گه‌ڕیان بت ، چ بۆ كۆمكرنا قویته‌كى یان داران بت ، د ریوایه‌تا بوخارى دا هاتییه : ( انْطَلَقَ ثَلاثَةُ نَفَرٍ مِمَّنْ كَانَ قَبْلَكُمْ حَتَّى آوَاهُمْ الْمَبِيتُ إلَى غَارٍ فَدَخَلُوهُ فَانْحَدَرَتْ صَخْرَةٌ مِنْ الْجَبَلِ فَسَدَّتْ عَلَيْهِمْ الْغَارَ.. سێ كه‌س ژ ملله‌ته‌كێ به‌رى هه‌وه ده‌ركه‌فـتـبـوون وبۆ نـڤـسـتـنـێ ئه‌و چوونه د شكه‌فته‌كێ ڤه ، كه‌ڤره‌ك ژ چیاى ڤه‌ره‌ست وكه‌فته به‌ر ده‌رێ شكه‌فتێ وده‌ر ل وان هاته گرتن ) .
ژ ڤێ ریوایه‌تێ ئاشكه‌را دبت كو ئه‌و هه‌ر سێ زه‌لام مابوونه ل چۆلـى حه‌تا لـێ بــوویــه شــه‌ڤ ، له‌و وان قه‌ستا شكه‌فته‌كێ كر دا بۆ وان ببته نهانى حه‌تا سپێدێ ، و د هنده‌ك ریوایه‌تێن دى دا هاتییه : ( بينما ثلاثة نفر يتمشَّون أخذهم المطر فأووا إلى غار فـي جـبـل ، فانحطت على فم غارهم صخرة من الجبل فانطبقت عليهم .. ل ده‌مه‌كى ســـــێ كه‌س ب ڕێڤه دچوون باران ل وان بارى ، ڤێجا وان خــــــۆ ب شكه‌فته‌كێ ڕا گه‌هاند ل چیاى ، وان هند دیت كه‌ڤره‌ك ژ چیاى ڤه‌ڕه‌ست وهات ما ب ده‌رێ شكه‌فتا وان ڤه وده‌ر ل وان هاته گرتن ) .
مه‌عنا : بارانێ به‌رێ وان دابوو ڤێ شكه‌فتێ ، وه‌سا یا دیاره كو بارانه‌كا هندا بۆش بوو كو به‌رێن مه‌زن وكه‌ڤران د گه‌ل ببه‌ت ، وله‌هى ولێمشتا ل دۆل ونهالان ڕاكه‌ت له‌و وان مرۆڤان د خۆ ڕا نه‌دیت بزڤڕنه مالێن خۆ یان بـمـیننه ل جهێن خۆ حه‌تا باران ڤه‌كه‌ت ، ووان دیت یا ژ هه‌مییێ باشتـر بۆ وان ئه‌وه ئه‌و بچن قه‌ستا شكه‌فته‌كا نێزیك ل چیاى بكه‌ن .
وپشتى وان خۆ ب شكه‌فتێ ڕا گه‌هاندى وهزر كرى ئه‌و ژ مه‌ترسىیێ خلاس بوون خافله‌تییه‌كا مه‌زنـتـر ب وان كه‌فت ده‌مێ وان دیتى كه‌ڤره‌كێ مه‌زن ژ چیاى ڤــه‌ڕه‌ســتــى وهاتـــى مایـه ب ده‌رێ وێ شكه‌فتێ ڤه یا ئه‌و لـێ ،
ئه‌ڤه چ بوو ؟
ئه‌و ژ چ ڕه‌ڤین .. و ب سه‌ر چ هلبوون ؟
تارىیا شكه‌فتێ تارییا شه‌ڤێ پتـر ل وان ڕه‌ش كر ، چ بكه‌ن ؟ كه‌ڤر ژ هندێ گرانـتـره ئه‌و وى پالڤه‌ده‌ن ، وچیایه كه‌س لـێ نینه ئه‌و هه‌وار بكه‌نێ .. مانه تشته‌كێ مه‌زنه مرۆڤ د قه‌بره‌كێ مه‌زن دا ب ساخى بێته ڤه‌شارتن ؟
ل ڤى ده‌مێ ته‌نگاڤییێ هه‌مى ڕێ ل وان هاتنه گرتن ب تنێ ڕێكه‌ك نه‌بت ، ڕێكا خودێ ..
و ژ سیاقێ حه‌دیسێ بۆ مه ئاشكه‌را دبت كو ئه‌ڤ هه‌ر سێ مرۆڤه ژ خودان باوه‌ران بوو ، له‌و وان دان وستاندن د گه‌ل ئێك كرن كانێ ئه‌م چ بكه‌ین ؟
( ته‌وه‌سسولا ) ب كریارێن چاك :
گاڤا وان دیتى كه‌ڤرى ده‌ر ل وان گرت ، وكه‌سه‌ك ژ مرۆڤێن وان نابت ب جهێ وان بكه‌ڤت ، وان گـۆته ئێك ودو : ژ خودێ پێڤه‌تر كه‌س ب جهێ مه ناكه‌ڤت وكه‌سه‌ك نینه بشێت د هه‌وارا مه بێت ، ڤێجا وه‌رن دا ئه‌م بۆ خۆ دوعا ژ خودێ بكه‌ین ، وهه‌ر ئێك ژ مه باشتـرین كارێ كو وى كرى بێژت به‌لكى سه‌ر خاترا وان كریارێن مه ل به‌رفره‌هییێ كرین خودێ ڤێ ته‌نگاڤییێ ژ سه‌ر مه ڕاكه‌ت ..
و ژ ڤـێ چـه‌نـدێ بـۆ مـه ئاشـكـه‌را دبت كو دورسته بۆ مرۆڤى ( ته‌وه‌سسولـێ ) ب باشتـرین كارێ خۆ بكه‌ت ؛ دا خودێ قه‌نجییێ ل وى بكه‌ت ، یه‌عنى : سه‌حكه‌تێ كانێ چ كارێ باش هه‌یه وى به‌رى هنگى كرى وى كارى بێژت وهـــه‌وارێن خۆ پێ بگه‌هینته خودێ دا بۆ خاترا وى كارى خودێ د هه‌وارا وى بێت .. ( ته‌وه‌سسولا ) شه‌رعى ئه‌ڤه‌یه ، نه وه‌كى هنده‌ك نه‌زانان ده‌مێ دكه‌ڤنه ته‌نگاڤىیه‌كێ هه‌وارێن خۆ دگه‌هیننه خودێ كو بۆ خاترا مرۆڤه‌كى یان داره‌كى یان به‌ره‌كى د هه‌وارا وان بێت ، ئه‌ڤه كاره‌كێ نه یێ دورسته .
وباشتـرین كار كو مرۆڤ ( ته‌وه‌سسولـێ ) پێ بكه‌ت ئیخلاصه ، یه‌عنى : ئه‌و كاره یـــێ مــرۆڤـى بۆ خودێ ب تنێ كربت نه‌كو بۆ فایده‌كى ژ فایدێن دنیایێ ، و ژ زانینا ڤان هه‌ر سێ زه‌لامان هه‌ر ئێك ژ وان كاره‌كێ خۆ یێ ئیخلاص تێدا گـۆت ..
زه‌لامێ ئێكێ وقه‌درێ ده‌یبابان :
پێغه‌مبه‌رى ـ سلاڤ لـێ بن ـ گـۆت : ( قَالَ رَجُلٌ مِنْهُمْ : اللَّهُمَّ كَانَ لِي أَبَوَانِ شَيْخَانِ كَبِيرَانِ وَكُنْت لا أَغْبِقُ قَبْلَهُمَا أَهْلاً وَلَا مَالاً فَنَأَى بِي طَلَبُ الشَّجَرِ يَوْمًا فَلَمْ أَرُحْ عَلَيْهِمَا حَتَّى نَامَا فَحَلَبْت لَهُمَا غَبُوقَهُمَا فَوَجَدْتـهمَا نَائِمَيْنِ فَكَرِهْت أَنْ أُوقِظَهُمَا وَأَنْ أَغْبِقَ قَبْلَهُمَا أَهْلاً أَوْ مَالاً فَلَبِثْت – وَالْقَدَحُ عَلَى يَدِي – أَنْتَظِرُ اسْتِيقَاظَهُمَا حَتَّى بَرِقَ الْفَجْرُ وَالصِّبْيَةُ يَتَضَاغَوْنَ عِنْدَ قَدَمِي فَاسْتَيْقَظَا فَشَرِبَا غَبُوقَهُمَا . اللَّهُمَّ إنْ كُنْت فَعَلْت ذَلِكَ ابْتِغَاءَ وَجْهِك فَفَرِّجْ عَنَّا مَا نَحْنُ فِيهِ مِنْ هَذِهِ الصَّخْرَةِ ـ زه‌لامه‌كى ژ وان گــۆت : یا ره‌ببى دایبابێن من د پیـر ومه‌زن بوون ، ومن چو ژ مال وعه‌یالـێ خۆ ب به‌ر وان نه‌دئێخسـتـن ، وڕۆژه‌كێ خواستنا داران ئه‌ز گیـرۆ كرم له‌و ئه‌ز نه‌شیام وه‌كى هه‌ر ڕۆژ ل ڕۆژئاڤایێ شیـرى بدۆشم وبۆ وان بینم ، وحه‌تا ئه‌ز هاتیم من شیـر بۆ وان دۆتى وئیناى من دیت ئه‌و یێن نڤستین ، ڤێجا من نه‌ڤیا وان ژ خه‌و ڕاكه‌م ودلـێ من نـه‌گرت به‌رى وان ئه‌ز شیـرى بده‌مه عه‌یالـێ خۆ ، ئه‌ز مام وئامان د ده‌ستێ من دا وزار زارا بچویكان ل به‌ر ده‌ست وپىیێن من حه‌تا بوویه سپێده وئه‌و هشیار بووین وشیـرێ خۆ ڤه‌خوارى ، یا ڕه‌ببى ئه‌گه‌ر من ئه‌وا هه بۆ كنارێ ته كربت تو مه ژ ڤێ ته‌نگاڤىیا ڤى كه‌ڤرى ئه‌م ئێخستینێ ڕزگار بكه ) .
كاره‌كێ ب ساناهى نینه ، هزر بكه‌ن مرۆڤه‌كێ ڕۆژا خۆ هه‌مییێ ل چۆلـى ببه‌ت ب دویڤ په‌زى وكرنا داران ڤه ، وحه‌تا پشتى ڕۆژ ئاڤا دبت ژى ل چۆلـى بـمـینت گاڤا دزڤڕته‌ڤه چه‌ند دێ یێ وه‌ستیاى بت ؟ وپشتى زڤڕییه مال وشیـر دۆتى وهاتى دا شیڤا ده‌یبابێن خۆ یێن پیـر و ب ناڤ سال ڤه چوویى بده‌تێ وى دیت ئه‌و یێن نـڤستین دلـێ وى نه‌گرت ده‌یبابێن خۆ هشیار بكه‌ت ژ ترسێن هندێ كو نه‌كو وان ب ڤـێ چـه‌نـدێ نـه‌خـۆش بـت ، وعه‌ده‌تێ وى نینه ئه‌و به‌رى ده‌یبابێن خۆ شیڤێ بـخـۆت ، چ بكه‌ت ؟
ئامانـێ وى ما دده‌سـتـى دا نـه وى شـیـڤ خوار ونه شیڤ دا عه‌یالـێ خۆ ئه‌وێن ژ برسان دا ل نك وى دكرنه گرى ، وئه‌و ب ڤى ڕه‌نگى ما حه‌تا لـێ بوویه سپێده وده‌یبابێن وى هشیار بووین ووان شیـر ڤه‌خوارى ژ نوى وى خوارن خوار ودا عه‌یالـێ خۆ !
كاره‌كـێ ب زه‌حـمـه‌تـه ، و ب تـنـێ ئـه‌و مـرۆڤ دشێن پێ ڕاببن یێن باوه‌رىیا ب خودێ دلێن وان تژى كرى .. وبۆچى وى ئه‌ڤ كاره كر ، گـۆت : یا ڕه‌ببى ئه‌گه‌ر من ئه‌وا هه بۆ كنارێ ته كربت تو مه ژ ڤێ ته‌نگاڤییا ڤى كه‌ڤرى ئه‌م ئێخستینێ ڕزگار بكه .
مه‌عنا : بۆ هندێ دا خودێ ژ وى ڕازى ببت وى ئه‌ڤ كاره كربوو ونه بۆ چو تشتێن دى ، وچونكى ئه‌ڤى كارێ وى ئیخلاص تێدا هه‌بوو خودێ دهه‌وارا وى هات وچه‌نده‌كێ كه‌ڤر ژ ده‌رێ شكه‌فتێ دویر ئێخست .
زه‌لامێ دووێ وترسا ژ خودێ :
( قَالَ الأخَرُ : اللَّهُمَّ كَانَتْ لِي ابْنَةُ عَمّ كَانَتْ أَحَـبَّ النَّاسِ إلَـيَّ ( وَفِي رِوَايَةٍ : ( كُنْت أُحِبُّهَا كَأَشَدِّ مَا يُحِبُّ الرِّجَالُ النِّسَاءَ فَأَرَدْتهَا عَلَى نَفْسِهَا فَامْتَنَعَتْ مِنِّي حَتَّى أَلَمَّتْ بِهَا سَنَةٌ مِنْ السِّنِينَ فَجَاءَتْنِي فَأَعْطَيْتهَا عِشْرِينَ وَمِائَةَ دِينَارٍ عَلَى أَنْ تُخَلِّيَ بَيْنِي وَبَيْنَ نَفْسِهَا فَفَعَلَتْ حَتَّى إذَا قَدَرْت عَلَيْهَا قَالَتْ : اتَّقِ اللَّهَ وَلَا تَفُضَّ الْخَاتَمَ إلَّا بِحَقِّهِ فَانْصَرَفْت عَنْهَا وَهِيَ أَحَبُّ النَّاسِ إلَيَّ وَتَرَكْت الذَّهَبَ الَّذِي أَعْطَيْتهَا اللَّهُمَّ إنْ كُنْت فَعَلْت ذَلِكَ ابْتِغَاءَ وَجْهِك فَافْرُجْ عَنَّا مَا نَحْنُ فِيهِ ـ یێ دى گـۆت : یا ره‌ببى من دۆتـمـامه‌ك هه‌بوو خۆشتڤیتـرین مرۆڤ بوو ل نك من ، و د ریوایه‌ته‌كا دى دا هاتییه : من وه‌سا حه‌ز ژێ دكر وه‌كى دژوارترین حه‌ژێكرنا زه‌لامان ژن پێ دڤێن ، جاره‌كـێ من داخوازا خرابییێ ژێ كر ئه‌و ل به‌ر نه‌هات ، حه‌تا ده‌مێ ته‌نگاڤییه‌ك ب سه‌ر وێ دا هاتـى ئـه‌و هاته نك من ، من سه‌د وبیست دینار دانێ ب وى شه‌رتى ئه‌و خۆ ب ده‌ست من ڤه به‌رده‌ت ، وێ قه‌بویلكر ، وگاڤا وێ خۆ ب ده‌ست من ڤه به‌رداى وئه‌ز شیایـمـێ ، وێ گـۆت : ته‌قوا خودێ بكه ونه ب حه‌لالـى بت كچینییا من خراب نه‌كه ، ئینا من پشت دایێ وئه‌و خۆشتڤیتـرین مرۆڤ بوو ل به‌ر دلـێ من ومن ئه‌و زێڕ ژى بۆ وێ هێلا یێ مـن دایێ ، یا ره‌بـبـى ئه‌گه‌ر من ئه‌ڤا هه بۆ كنارێ ته كربت تو ڤێ ته‌نگاڤییێ ژ سه‌ر مه ڕاكه ).
( شه‌هووه‌ت ) دژوارترین ڕێكه شه‌یطان پێ دئێته مرۆڤى ، و ب تنێ ئه‌و مرۆڤه دشـێـت خـۆ بـپـارێـزت یێ باوه‌رییا ب خودێ دلـێ وى تژى كرى ، ڤێ كچا هه ب تــرسا وێ یا مــه‌زن ژ خــودێ نــه ب تــنـێ خۆ پاراست به‌لكى ئه‌ڤ زه‌لامه ژى ژ غه‌فله‌تا وى هشیار كر ، د ریوایه‌ته‌كا دى یا حه‌دیسێ دا هاتییه : گاڤا زه‌لامى ڤیاى خـرابـییێ بكه‌ت دۆتـمـاما وى ڕه‌جفى وى پسیار ژێ كر : ته خێره ؟ وێ گـۆت : (( أخاف الله رب العالمین ـ ئه‌ز ژ خودێ خودایێ هه‌مى چێكرییان دترسم )) وگاڤا زه‌لامى گوهــ ل ڤێ گـۆتنا وێ بووى ، باوه‌رییا ب خودێ د دلـێ وى ژى دا هشیار بوو ، له‌و گـۆتێ : د ته‌نگاڤییێ دا تــــو ژ وى دتــــرسـى وئه‌ز د به‌رفره‌هییێ دا ژێ نه‌ترسم ؟ پاشى وى پشت دایێ و د دنیایێ كه‌سه‌ك ل به‌ر كه‌سه‌كى هند یا شرین نه‌بوو هندى ئه‌و ل به‌ر وى یا شرین ، به‌لـێ ب جهــ ئینانا ئه‌مرێ خودێ ل به‌ر وى یا شرینتـر بوو .
زه‌لامێ سییێ وده‌سپاكى :
( وَقَالَ الثَّالِثُ : اللَّهُمَّ إنِّي اسْتَأْجَرْت أُجَرَاءَ وَأَعْطَيْتهمْ أَجْرَهُمْ غَيْرَ رَجُلٍ وَاحِدٍ تَرَكَ الَّذِي لَهُ وَذَهَبَ فَثَمَّرْت أَجْرَهُ حَتَّى كَثُرَتْ مِنْهُ الأمْوَالُ فَجَاءَنِي بَعْدَ حِينٍ فَقَالَ : يَا عَبْدَ اللَّهِ أَدِّ إلَيَّ أَجْرِي فَقُلْت : كُلُّ مَا تَرَى مِنْ أَجْرِك : مِنْ الأبِلِ وَالْبَقَرِ وَالْغَنَمِ وَالرَّقِيقِ . فَقَالَ : يَا عَبْدَ اللَّهِ لَا تَسْتَهْزِئْ بِي ! فَقُلْت : لَا أَسْتَهْزِئُ بِك فَأَخَذَهُ كُلَّهُ فَاسْتَاقَهُ فَلَمْ يَتْرُكْ مِنْهُ شَيْئًا : اللَّهُمَّ إنْ كُنْت فَعَلْت ذَلِكَ ابْتِغَاءَ وَجْهِك فَافْرُجْ عَنَّا مَا نَحْنُ فِيهِ ! فَانْفَرَجَتْ الصَّخْرَةُ فَخَرَجُوا يَمْشُون ـ ویـێ سـییێ گـۆت : یا ره‌بـبـى من هنده‌ك پاله بـۆ خـۆ ب كـرێ گـرتـن ، پاشى من كرێیا هه‌ر ئێكى ژ وان دایێ ئێك ژ وان تێ نه‌بت ئه‌و چوو وكرێیا خۆ نه‌بر ، من پارێ وێ بۆ وى دا شـۆلـى حه‌تا ئه‌و بوویه ماله‌كێ مشه ، پشتى ده‌مه‌كى ئه‌و هات گـۆت : ئه‌ى عه‌بدێ خودێ كرێیا من بده من ، من گـۆتێ : ئه‌ڤ مالـێ تو دبینى ژ حێشتـر وچێل وپه‌ز وبه‌نىیان هه‌مى یێ ته‌یه ! وى گـۆت : ئه‌ى به‌نىیێ خودێ یارییان بۆ خۆ ب من نه‌كه ، من گـۆتێ : ئه‌ز یارییان ب ته ناكه‌م ، ئینا وى ئه‌و مال هه‌مى بر وتشته‌ك ژێ نه‌هێلا ، یاره‌ببى ئه‌گه‌ر من ئه‌ڤا هه بۆ كنارێ ته كربت تو ڤێ ته‌نگاڤییا ئه‌م تێدا ژ سه‌ر مه ڕاكه ، ئینا كه‌ڤر ژ جهــ چوو وئه‌و ده‌ركه‌فتـن ) .
ئه‌ڤ كارێ زه‌لامێ سىیێ ژى كرى ئه‌نجامێ دله‌كێ ب باوه‌رییێ ئاڤایه ، خودانێ كارى كـرێیا پالـه‌یێ خۆ دایێ وى وه‌رنه‌گرت وچوو ، و د ڤى حالـى دا فه‌توا دبێژت : وى حه‌قێ هه‌ى پشتى هنگى كرێیا وى نه‌ده‌تێ ، نه‌خاسم ئه‌گه‌ر چه‌ند سال د سه‌ر ڕا ببۆرن ، به‌لـێ ترسا ژ خودێ ڕێ نه‌دا وى ئه‌و ڤى كارى بكه‌ت ئه‌گه‌ر خۆ بۆ وى یێ حه‌لال ژى بت ، له‌و وى كرێیا وى بۆ وى زڤڕاند ، نه حه‌قێ كارێ وى یێ ڕۆژه‌كێ به‌لكێ هـزار قات پتـر ، چه‌ند ده‌رهه‌مه‌ك وى بۆ پاله‌یێ خۆ ب خودان كرن حه‌تا بووینه مالیه‌ته‌كێ مه‌زن ، ووى حه‌ق هه‌بوو هنده‌كێ ژ وى مالـى بــۆ خـــۆ ڕاكــه‌ت ؛ به‌رانبه‌ر كارێ خۆ ، به‌لـێ وى ئه‌و ژى نه‌كر ، بۆچى ؟ ژ ترسێن خودێ دا !
ل ڤێرێ .. گاڤا وان هه‌ر سێ كارێن خۆ یێن باش گـۆتین وداخواز ژ خودێ كرى كو بۆ خاترا ڤان كاران ئه‌و د هه‌وارا وان بێت خودێ داخوازا وان ب جهــ ئینا وعه‌مره‌كێ نوى دایێ وئه‌و ژ ڤێ ته‌نگاڤییا مه‌زن خلاس كرن .
سێ ده‌رد .. وده‌رمانه‌ك :
حه‌ژێكرنا عه‌یالـى وژنێ ومالـى ژ وان غه‌ریزانه یێن خودێ د گه‌ل مرۆڤى داین ؛ دا د گه‌ل مرۆڤى بژین وئه‌گه‌ر هات ومرۆڤى ـ ب ته‌وفیقا خودێ ـ شیا ڤان هه‌ر سێ شه‌هوه‌تان ب شریعه‌تى توخویب بده‌ت دێ شێت خۆ ژ ده‌ردێ وان یێ مه‌زن ڕزگار كه‌ت ، وئه‌گه‌ر وى هه‌ڤسارێ ڤان شه‌هوه‌تان به‌ردا وگوهــ ل شریعه‌تى نه‌ما ئه‌ڤ هه‌ر سێ ده‌رده به‌رێ وى دێ ده‌نه هیلاكێ ..
وته‌قوا خودێ وئیخلاص ده‌رمانێ ئێكانه‌یه یێ مرۆڤى ژ ڤان هه‌ر سێ ده‌ردان دپارێزت .. ئه‌ڤه‌یه ئه‌و ده‌رسا ڤێ حه‌دیسێ دڤێت مه لـێ هشیار بكه‌ت .
کومــێتــدان لسـه‌ر بابــه تـی