نیشانێت بەرز و بلنداهیا پێغەمبەری (ﷺ)

 

نیشانێت بەرز و بلنداهیا پێغەمبەری (ﷺ)

1. پێغەمبەر (ﷺ) دبێژیت هوین دزانن دەیک و بابێت من و نەسەبا من و کەس و کارێت من و بنەمالا من ،هوین هەمیا دنیاسن هەر ژ ئادەمی هەتا من ،حالەتێت زنا و کرێتیێ دناڤ بنەمالا مندا نینن هەمی ب ژنئینانێ بویە. 

2. ئێک ژ زانایا دبێژیت هەتا پێنچ سەد دەیک و بابێت پێغەمبەری (ﷺ) ئەز یێ ل دویف چویم من چ کارێ خراپ دڤێ زنجیرێدا نەدیتینە. 

3. پێغەمبەر (ﷺ)دبێژیت ژیانا من بو هەوە خێرە و مرنا من ژی بو هەوە خێرە . سەحابیان گوتێ یا ژیانێ مە زانی بەس یا مرنێ چەوا خێرە؟ پێغەمبەری (ﷺ) گوتێ ئەگەر خودایێ مەزن ڤیا دلوڤانیێ ب ئوممەتەکێ ببەت دێ پێغەمبەرێت وان بەری وان مرینیت. 

4. قەتادە دبێژیت: نینە گوتاربێژەک خوتبێ بخوینیت ، نینە نڤێژکەرەک شەهدەیێ بدەت یان کەسەکێ موسلمان شەهدە بدەت ئیلا دێ ناڤێ پێغەمبەری (ﷺ) دگەل ئینیت(أشهد أن لا إله إلا الله و أشهد أن محمدا رسول الله). 

5. ئەبو سەعیدێ خودری دبێژیت: پێغەمبەری (ﷺ)بو مە دگوت جبریل (علیە السلام)هاتە دەف من گوت خودێ من و خودێ تە چەوا قەدرێ تە گرتیە ؟ دبێژیت : پێغەمبەری (ﷺ)گوت خودێ دزانیت . گوت جبریلی گوت خودایێ مەزن دبێژیت نینە ناڤێ من بێتە گوتن ئیلا دێ ناڤێ تە دگەل ئێتە گوتن (أشهد أن لا إله إلا الله و أشهد أن محمدا رسول الله). 

6.عطاء دبێژیت ئیمانا کەسێ تمام نابیت هەتا ناڤێ پێغەمبەری (ﷺ)نە پالدەتە ناڤێ خودایێ مەزن ئانکو هەردووکان پێکڤە بێژیت (أشهد أن لا إله إلا الله و أشهد أن محمدا رسول الله). 

7. دئایەتەکێدا خودایێ مەزن گەلەک نەرم دگەل پێغەمبەری (ﷺ) دئاخڤیت دەمێ دبێژیتێ (عفا الله عنك لم أذنت لهم) التوبة٤٣ گازندەکە ژ پێغەمبەری (ﷺ)تە بوچی دەستویری دا وان نەدەرکەڤنە شەری بەلێ خودایێ مەزن دەستپێکێ گوتێ خودێ لتە بوری .. ژنوی گوتێ تە بوچی دەستویری دا وان نەدەرکەڤنە جیهادێ .. ل ڤێرێ زانا دبێژن هەروەکی خودێ دبێژتە پێغەمبەری (ﷺ)ئەی ئەڤێ دل پاقژ تە ژدل پاقژیا خو دەرفەت دا وان نەدەرکەڤنە جیهادێ .. دیسا زانا دبێژن ئەگەر دەستپێکێ گوتبایێ تە بوچی دەرفەت دایێ نەدەرکەڤنە جیهادێ  ژنوی گوتبایێ خودێ لتە بوری .. نەکە دلێ پێغەمبەری (ﷺ) ژ ترسێت خودێ دا خراب بوبا.. بەلێ خودایێ مەزن قەدرێ پێغەمبەری (ﷺ)گرت و دەستپێکێ گوتێ خودێ لتە بوری. 

8. زانا دبێژن ژ سالوخەتێت قەدرگرتنا پێغەمبەری (ﷺ) ئەوە خودایێ مەزن هەمی پێغەمبەران ب ناڤێ وان یێ گازی کریێ .. یا گوتیێ (یا نوح ..یا موسی.......) بەلێ خودایێ مەزن ب ژیانا پێغەمبەری (ﷺ) یا سویند خواری  هەروەکی دبێژیت: (لعمرك إنهم لفي سكرتهم يعمهون) الحجر اية٧٢. ئانکو ب ژیانا تە.....). 

9. عبداللە کورێ عەباسی دبێژیت: خودایێ مەزن کەس نەدایە نە ئەڤێن چوین و نە ئەڤێن دێ ئێن ب رێز و بهاتر ژ پێغەمبەری (ﷺ) لەوا خودێ یا ب ژیانا وی سویند خواری. 

10. دئایەتەکا دیدا خودایێ مەزن دبێژیتە پێغەمبەری (ﷺ) (والله يعصمك من الناس) المائدة٦٧(خودێ دێ تە ژ خەلکی پارێزیت) ئانکو: ئەگەر خەلک هەمی کوم ببن دا زیانەکێ بگەهیننە تە نەشێن و دەمێ ئەڤ ئایەتە هاتیە خوارێ پێغەمبەری (ﷺ) گوتە وان سەحابیان ئەوێت زێرەڤانیا وی دکر هەرن زێرەڤانیێ ل من نەکەن خودایێ مەزن سوزا(ضمان) پاراستنێ یا دایە من.