جهێت پێغەمبەرێ مە(ﷺ) تێدا گرنژی

 

جهێت پێغەمبەرێ مە(ﷺ) تێدا گرنژی

1. ئەبو هورەیرە دبێژیت: عومەرێ کورێ خەطابی هاتە مالا پێغەمبەری (ﷺ) و چوو دژورڤە بەرێ خو دایێ ژنکێت پێغەمبەری (ﷺ) یێت لێ کومبوین و دەنگێ خو یێ لێ بلند دکەن و هەر ئێك یا داخوازیێت خو دبێژیتێ ، ئەبو هورەیرە دبێژیت چەوا عومەر هاتە بەر دەرگەهی هەمی رەڤین چونە پشت پەردان و خو ڤەشارتن، دبێژیت پێغەمبەری (ﷺ) گوتێ کەرەمکە یا عومەر ق دکرە کەنی ، دبێژیت عومەری گوتێ: خودایێ مەزن کەیفا تە بینیت یا پێغەمبەرێ خودێ تو یێ دکەیە کەنی، دبێژیت: پێغەمبەری (ﷺ) گوت کەنیا من یا ب ڤان ژنان دئێت بەری نوکە تە دیتبان و ڤێ گاڤێ بەرێ خو بدێ هەمیا خو ڤەشارت و یێت چوینە پشت پەردان ژ بور تە ، دبێژیت عومەری گوت یا پێغەمبەرێ خودێ دڤێت ئەڤ ژنە پتر هەیبەتێ و ترسێ ژتە وەرگرن و زڤری و گوتێ هەی دوژمنێت نەفسێت خو هوین پتر هەیبەتێ ژمن وەردگرن ژ پێغەمبەری (ﷺ)، دبێژیت پێغەمبەری (ﷺ) گوتێ یا عومەر ب خودێ تو کەسەکی هەکە دکولانەکێرا بچی ئیللا شەیتان دێ رەڤیت و دێ رێکەکا دی گریت.

2. عائیشا دبێژیت:ئەز دگەشتەکێ دا دگەل پێغەمبەری (ﷺ) چوم هێش ئەز یا جحێل و زەعیف بووم دبێژیت پێغەمبەری (ﷺ)گوتە صەحابیان هوین هەرن و مە پێت خو گرانکرن ، دبێژیت دەمێ ئەو چوین ... پێغەمبەری (ﷺ) گوت یا اللە عائیشا دا ئەز و تو بەریکانێ بکەین و دبێژیت مە کرە غار و من دبەر پێغەمبەری (ﷺ) را کر ، دبێژیت پشتی چەند سال ب سەرڤە چوین دەمەکێ ئەز قەلەو بووم و لەشێ من گوشتی گرت دیسا ئەم ب گەشتەکێ دەرکەفتین ، پێغەمبەری (ﷺ) گوتە صەحابیان هوین هەرن و گوتە من یا اللە عائیشا دا بەریکانێ بکەین ، دبێژیت مە بەریکانە کر ... پێغەمبەری (ﷺ) بەریکا من راکر و دبێژیت کرە کەنی و گوت ئەڤە ژ پێش جارا دیڤە.

3. ئەنەسێ کورێ مالکی دبێژیت پێغەمبەر (ﷺ) گەلەك یێ خوش بوو دگەل خەلکی چ جارا دلێ کەسەکێ نەدهێلا ، دبێژیت جارەکێ ئەز هنارتمە کارەکی ، ئەز ژی هاتم و من ددلێ خو دا گوت دێ چم بو خو یاریان کەم ناچمە وی کاری و دبێژیت ئەز چوم من یاری کرن من ئەو کار نەکر ، دبێژیت پێغەمبەر (ﷺ) ژ پشتڤە هات و دەستێت خو دانانە سەر ملێت من ، ئەز زڤریم بەرێ خو ددەمێ پێغەمبەرە (ﷺ) و یێ دکەتە کەنی،  گوتە من یا ئونەیس ما من نەگوتبوتە هەرە شولەکێ بکە ، دبێژیت من گوتێ بەلێ یا پێغەمبەرێ خودێ ، خودێ ئها ڤێ گاڤێ دێ چم  و دبێژیت من ئەو کار کر.

4. عائیشا خودێ ژێ رازی بیت دبێژیت: سەلما ئێك ژوان ژنان بوو یێن خزمەتا پێغەمبەری (ﷺ) دکر هاتە دەف پێغەمبەری (ﷺ) و سەر و چاڤێت وێ درەش و شینن ، گوت یا پێغەمبەرێ خودێ ئەبو رافعی ئەز یا قوتایم (ئەبو رافع زەلامێ وێ بوو) ، پێغەمبەری (ﷺ) گوت خێرە بوچی تو قوتایی؟ کا فرێکە دویڤرا ، ئەبو رافع هات ... پێغەمبەری (ﷺ) گوتێ بوچی تە قوتایە؟ گوت یا پێغەمبەرێ خودێ مایێ خو دمن دکەت ، پێغەمبەری (ﷺ) گوت کا وەرە سەلما تە چ مایێ خو تێ کریە؟ سەلمایێ گوت یا پێغەمبەرێ خودێ ئەبو رافع چو دنڤێژێ دا ئەز پێ حەسیام بێ دەستنڤێژ بوو من ژی گوتێ تو بێ دەستنڤێژ بووی ،نڤێژا خو بەتال کر و هات ئەز تێر قوتام ، عائیشا دبێژیت پێغەمبەری (ﷺ) وەسا پێ کرە کەنی و گوتێ یا ئەبو رافع یا خێرێ یا بوتە دبێژیت ڤێجا تو ژ خێرێ ژی عێجز دبی.

5. دبێژن ئێکێ جوهی هاتە دەف پێغەمبەری (ﷺ) کو ئێك ژ ئەحبارێت جوهیا بوو ، گوت یا محمد روژا قیامەتێ خودایێ مەزن دێ ئاسمانی دانیتە سەر تبلەکا خو و ئەردی دانیتە سەر تبلەکا دی و چیایا ژی دانیتە سەر تبلەکا دی و دار و بەر و رویبار و ڤان هەمی چێکریان دٸ دانیتە سەر ئێکا دی و پشتی هینگێ دێ بێژیت (أنا الملك) ، دبێژیت پێغەمبەری (ﷺ) پێ کرە کەنی و ئەڤ ئایەتە بو خواند( وَمَا قَدَرُوا اللَّهَ حَقَّ قَدْرِهِ وَالْأَرْضُ جَمِيعًا قَبْضَتُهُ يَوْمَ الْقِيَامَةِ وَالسَّمَاوَاتُ مَطْوِيَّاتٌ بِيَمِينِهِ ۚ سُبْحَانَهُ وَتَعَالَىٰ عَمَّا يُشْرِكُونَ). الزمر 67

ئانکو: وڤان بوتپه‌رێسان خودێ ب دورستى مه‌زن نه‌كرییه‌ وه‌كى ئه‌و يێ ژ هه‌ژى؛ چونكى وان د گه‌ل وى په‌رستنا وى تشتى كر يێ نه‌ مفاى ونه‌ زيانێ نه‌گه‌هينت، ڤێجا وان ئه‌و ئافراندى ئينا ڕێزا ئافرانده‌رى، ئه‌وێ ژ شيانا خۆ يا مه‌زن ڕۆژا قيامه‌تێ عه‌ردى هه‌مییێ ب مسته‌كێ دگرت، وعه‌سمان د ده‌ستێ وى يێ ڕاستێ دا دپێچاينه‌، خودێ يێ پاك وپيرۆز بت ژ وێ شركا ئه‌ڤ بوتپه‌رێسه‌ پێ دكه‌ن. وئه‌ڤ ئايه‌ته‌ ده‌ليله‌ ل سه‌ر هه‌بوونا مستێ وده‌ستێ ڕاستێ وپێچانێ بۆ خودێ ب ڕه‌نگه‌كێ بابه‌تى وى بت، بێى چاوانییه‌ك يان وه‌كهه‌ڤییه‌ك بۆ بێته‌ ده‌سنيشانكرن.

6. ئەبو ذر الغفاری خودێ ژێ رازی بیت دبێژیت پێغەمبەری (ﷺ) بو مە دگوت روژا قیامەتێ دێ هندەك مروڤا ئینن ئێك ژوان زەلامەکە ، خودایێ مەزن دێ بێژیتە مەلائیکەتان گونەهێت وی یێن بچویك بداننە پێش چاڤان ، دێ داننە پێش چاڤان ، دبێژیت ئەو دزانیت د ناڤ وان گونەهێت وی یێت بچویکدا یێت مەزن ژی یێت هەین گوت ئەو زەلام دێ بێژیت ئەو گونەها هە نەگوت ــ و ئەو دێ خو مت کەت و خو بسەر گونەهێت خو یێت مەزن ژی ڤە نابەت و بەحسێ وان ژی ناکەت ، گوت خودایێ مەزن دێ بێژیتە مەلائیکەتان دێ ژ پێش هەر گونەهەکا ویڤە خێرەکێ بو دانن ، دبێژیت پێغەمبەری (ﷺ) گوت ژ نوی ئەو زەلام دێ بێژیت یارەبی فلان گونەهــ من یا کری ، پێغەمبەری (ﷺ) ب ڤی زەلامی کرە کەنی.

7. دبێژیت ئێك هات پرسیار ژ پێغەمبەری (ﷺ) کر گوت یا پێغەمبەرێ خودێ دبێژن مروڤی چ ل بەهەشتێ دڤێت خودێ دێ دەتێ ، پێغەمبەری (ﷺ) گوتێ بەلێ ، گوت با ئەگەر ئێك گەلەك حەژ چاندنێ بکەت ل بەهەشتێ و دڤێت بو خو دار و باری بچینیت دێ چەوا بیت، پێغەمبەری (ﷺ) گوت خودایێ مەزن دێ بێژیتێ تە دڤێت بو خو چ بچینی؟ فلان دارێ دێ وێ گاڤێ توفکا وێ هاڤێت ، وێ گاڤێ دێ بلند بیت و هندی چیایەکێ دێ درێژ بیت و دێ فێقی ژی دەت و دێ بێژیتێ ها ئەو فێقیێ دارا تە ل بەر تە و هندی ژێ دخوی بخو ، دبێژن ئێکێ (ئەعرابی) ل وێرێ بوو گوتێ یا پێغەمبەرێ خودێ ب خودێ ئەو ئێك یێ قورەیشیە هەکە ئەم ئەڤێت دی شولا مە نینە ل وێرێ یان ژی خەلکێ مەدینێ یە .. ئەنصاری یە؟ دبێژن پێغەمبەری (ﷺ) گەلەك ب وی کەسی کرە کەنی.

8. عائیشا خودێ ژێ رازی بیت دبێژیت جارەکێ پێغەمبەر (ﷺ) یێ نڤستی بوو دنڤستنا خو دا کرە کەنی و پشتی هینگێ هشیار بوو ، من گوتێ یا پێغەمبەرێ خودێ تە دکرە کەنی دەمێ تو یێ نڤستی ، گوت پێغەمبەری (ﷺ) گوت بەلێ هندەکێت قەومێ من دێ دەمەکێ ئێن و مەزناتیێ ل کەعبێ کەن و وان گەلەك کەعبە نەڤێت ، دەمێ جارەکێ ئەو هەمی ژ مەکەهێ دەردکەڤن دێ خودایێ مەزن وان ب هەمیڤە دئەردیدا بەت.

9. عبدالرحمن کورێ ئەبزی دبێژیت جارەکێ ئەم دگەل عومەرێ کورێ خەطابی بوین ، زەلامەك هاتە دەف عومەری و گوتێ یا مەزنێ موسلمانان هەیڤەك دوو هەیڤ ب سەر مەدا دئێن هندەك جارا ئەم ئاڤێ نابینین ، دبێژیت عومەری گوتێ ب خودێ ئەز چ گاڤا ئاڤێ نەبینم ئەز نڤێژێ ناکەم ، دبێژیت عەمارێ کورێ یاسری گوتێ ها یا مەزنێ موسلمانان بیرا تە دئێت دەمێ ئەم بێنڤێژ بوین ، نەبوو ، تە چەوا خو پاقژ کر تو رابووی تە خو دتوزێ ڤەدا و تە خو گەڤزاند و ئەم چوینە دەف پێغەمبەری (ﷺ) و مە گوتێ عومەری یا وەکری (تەیەمموم) یا کری و یا خو دتوزێ ڤەدای ، پێغەمبەری (ﷺ) کرە کەنی و گوت عومەر هەکە وەسا بیت رویێ ئەردی تێرا دەهێت وەکی تە ناکەت ، و گوت وەسا تەیەممومێ ناکەن ، دێ دەستێن خو ل ئاخێ دەی و دێ پف کەیێ و دێ ژنوی مەسح کەی سەروچاڤێت خو و هەردوو دەستێن خو ، دبێژن عومەری گوتێ یا عەممار تەقوا خودێ بکە و عەمماری گوتێ یا مەزنێ موسلمانان هەکە تە دڤێت یێت دی ئەز نابێژم هەما هەتا ڤێرێ بەسە ، گوت عومەری گوتێ بلا هەتا ڤێرێ بەس بیت.

10. پێغەمبەری (ﷺ) جارەکێ لسەر مینبەرێ خوتبە دخواند ، ئێك هات خودانێ رەز و چەمان بوو گوت یا پێغەمبەرێ خودێ باران نەهاتینە ....هەکە تو دوعا بکەی باران بێت . دبێژن پێغەمبەری (ﷺ) دوعا کرن ، هند باران هات هەتا خوتبا پشتی وێ خەلك نەشیا ژ مالێت خو دەرکەڤیت ، هەر ئەو زەلام هات گوت یا پێغەمبەرێ خودێ هەکە تە دوعا کربان بلا باران راوەستیابان ئەم خەندقین ، ئینا پێغەمبەری (ﷺ) دوعاکرن یارەبی باران راوەستن یارەبی ل دەوروبەرێت مە بێن و ل مە نەئێن و پێغەمبەری (ﷺ) ب ڤی مروڤی کرە کەنی.

11. عبداللە کورێ مەسعودی دبێژیت پێغەمبەری (ﷺ) گوت دویماهیك ئێك دچیتە دبەهەشتێ دا کەسەکە یێ لسەر پرا سیراطێ یێ دچیت جار یێ ب ڤی لایدا دکەڤیت و جار ب لایێ دیدا ، و هندەك جها ئاگر یێ نێزیك دبیت یێ دکەتە هەوار بەس خودێ ئەز ژ ڤێ چەندێ خلاس کربام من چ نەدڤیا ، و دبێژیت پێغەمبەری (ﷺ)گوت دێ ژێ خلاس بیت و دەمێ ژێ خلاس دبیت دێ دارەك ئێتە بەر سینگی ژ دارێت گەلەکێت جوانە ، دێ بێژیت یا خودێ بەس تو من نێزیکی وێ دارا هە بکەکو ئەز بچمە بن سیبەرا وێ ژ فێقیێ وێ بخوم من چ دی نەڤێت و ئەز چ تشتێ دی ژتە ناخوازم ، گوت خودایێ مەزن دێ هێزێ دەتێ هەتا دچیتە بن وێ دارێ ، دەمێ دچیتە بن وێ دارێ دێ بینیت دارەکا دی ، خودایێ مەزن دزانیت دێ داخوازیێت وی زێدەبن ، ئەو دارا دی ژوێ خوشتر و ب فێقیترە ، دبێژیت یارەبی بەس تو من نێزیکی وێ دارێ بکە ، دبێژیت خودایێ مەزن دێ بێژیتێ یا عەبدێ من ما تە نەگوتبوو ئەز چ داخوازیێت دی ناکەم  ، دێ بێژیت یارەبی بەس ڤێ جارێ ژی، خودایێ مەزن دێ بێژیتێ دێ سوزێ بدە تو چ داخوازیێت دی نەکەی ، دبێژیت سوز بیت ، ڤێجا دێ چیتە بن وێ دارێ ژی هەتا دارەکا دی لبەر دەرێ بەهەشتێ دبینیت ، دێ بێژیت یارەبی بەس وێ دارا هە ، گوت خودایێ مەزن دێ بێژیتێ کا ببەنە بن وێ دارێ ژی ، پێغەمبەر(ﷺ) دبێژیت ل وێرێ دێ دەنگێ خەلکێ بەهەشتێ ئێتێ کەیفا وان یا خوشە ، دێ بێژیت یارەبی من ببە دبەهەشتێ دا ، دێ خودایێ مەزن بێژیتێ ما ئەڤە چەند جارا تە گوت ئەز چ داخوازیێت دی ناکەم؟ دێ بێژیت یارەبی بەس من ببە دبەهەشتێ دا من چ دی نەڤێت ، دێ خودایێ مەزن بێژیتێ یا عەبدێ من ما تە نەڤێت دبەهەشتێ دا ئەز تشتی هندی ددونیایێدا و دگەل وێ هندێ دی بدەمە تە ، پێغەمبەر (ﷺ) دبێژیت: ئەو مروڤ دێ بێژیتێ یارەبی تو ترانا ب من دکەی و تو (رب العزة)یی .. خودانێ مەزناتیێ ، دبێژیت :پێغەمبەری (ﷺ)گەلەك ب ڤی مروڤی کرە کەنی ، ژبەر کو خودایێ مەزن ژی ب ڤی کرە کەنی.

12. عومەرێ کورێ عاصی دبێژیت پێغەمبەری (ﷺ) ئەز هنارتمە شەرێ (ذات السلاسل)، ب رێکێ ڤە شەڤەکا گەلەك سار بوو لەشێ من بێ نڤێژ بوو ، دبێژیت ئەز ژخو ترسیام هەکە ئاڤێ ل خو بکەم نەکو ژ سەرمادا بمرم ، دبێژیت ئەز رابوم من تەیەمموم کر و نڤێژا سپێدێ ل بەری موسلمانان ب جەماعەت کر ، دبێژیت پشتی هینگێ دەمێ ئەم هاتینە دەف پێغەمبەری (ﷺ) من گوت دا پرسیار کەم کا ئەز ب ڤی تشتی یێ دروست بووم یان نە؟ دبێژیت من گوتێ یا پێغەمبەرێ خودێ من نڤێژ وەسا یا کری ، دبێژیت پێغەمبەری (ﷺ) گوت تو نڤێژێ ل بەراهیکا موسلمانان دکەی و تو نەیێ پاقژ ، دبێژیت من گوتێ یا پێغەمبەرێ خودێ پا شەڤ گەلەکا سار بوو ئەز ژخو ترسیام و بیرا من و ڤێ ئایەتێ هات:(ولا تقتلوا أنفسکم إن اللە کان بکم رحیما). النساء 29 من ژی هەما تەیەمموم کر و نڤێژ بەری خەلکی کر ، پێغەمبەری (ﷺ) پێ کرە کەنی و دەینەکرێ.

13. ئەبو سەعید الخودری دبێژیت پێغەمبەری (ﷺ) گوت :( روژا قیامەتێ خودایێ مەزن دێ ڤێ تەپا ئەردی ئەوا ئەم لسەر دێ وەرپێچیت و وەکی پاریەکێ لێ کەت و دبیتە رەنگەکێ خوارنێ بو خەلکێ بەهەشتێ) ، وەکی ئەڤ ئاخفتنە بو صەحابیان گوتی ئێکێ جوهی هاتە وێرێ ، ئەبو سەعید ئەڤ ئاخفتنا پێغەمبەری (ﷺ) گوهــ لێ نەبوو دەمێ وەدگوتی هات و گوت:( بارك الرحمن علیك یا أبا قاسم) بوتە بێژم زادێ خەلکێ بەهەشتێ چیە یان یێ چاوایە پێغەمبەری (ﷺ) گوتێ بەلێ یێ چاوایە؟ گوت روژا قیامەتێ ئەرد وەکی پاریەکێ لێ دئێت دبێژیت وەکی ئەڤ ئاخفتنە گوتی پێغەمبەری (ﷺ) بەرێ خو دامە و گرنژی ، (ژبەرکو ئەو یێت کتێبێت واندا ژبەر هندێ وی دزانی ) و دبێژیت پێغەمبەری (ﷺ)ئیشارەت دامە گوهێ خو بدەنێ ، ئەوێ جوهی گوت یا پێغەمبەرێ خودێ تو دزانی ئەو دێ چاوا وی زادی خون و دێ ب چ خون؟ گوت: دێ وی زادی ب زێدە مێلاکا گولکی خون، ئەبو سەعید دبێژیت پێغەمبەری (ﷺ) ب ڤی زەلامێ جوهی کرە کەنی.

14. ئەبو ذر الغفاری دبێژیت پێغەمبەر (ﷺ) یێ روینشتی بوو و پەزێ مە ئالف دخوار و دوو ژوان رابوون دانا ئێك و دوو ب قوچا ، دبێژیت پێغەمبەری (ﷺ) پێ کرە کەنی صەحابیان گوتێ خێرە یا پێغەمبەرێ خودێ ، دبێژیت پێغەمبەری (ﷺ) گوت دێ سەحکەنە ڤان ب خودێ روژا قیامەتێ گەلەك وەکی ڤان دێ قوچانێ کەن و ئەڤە ب خو ژی دێ قوچانێ کەن.

15.  بەحسێ زەلامەکێ دکەن دبێژن درەمەزانێ دا روژیەك خوار ئینا ئەو زەلام هاتە دەف پێغەمبەری (ﷺ) گوت یا پێغەمبەرێ (ﷺ) خودێ ئەز دهیلاك چوم من روژیەك یا خواری ، پێغەمبەری (ﷺ) گوتێ باشە تە ئێك ژ سێ تشتان یا لبەر یان دێ گەردەنا عەبدەکێ ئازا کەی وی زەلامی گوت یا پێغەمبەرێ  خودێب خودێ ئەڤە ژمن نائێت ئەز نەشێم ، پێغەمبەری (ﷺ) گوتێ با دێ دوو هەیڤان ل دویف ئێك ب روژی بە گوت ب خودێ ئەز وێ ژی نەشێم ، پێغەمبەری (ﷺ) گوتێ با دێ شێست فەقیران تێر کە ... زادی بدێ ، گوت یا پێغەمبەرێ خودێ ب خودێ من چ نینە بدەمێ ، پێغەمبەری (ﷺ) گوت کا هەرن سەلکا هەنێ یا تژی قەسپ بینن ، پێغەمبەری (ﷺ)گوتێ دێ هەرە ڤان قەسپان بدە شێست فەقیران ، گوت ب خودێ یا پێغەمبەرێ خودێ کەس ژ من فەقیرتر نینە ، هەما بلا بو من بن ، پێغەمبەری (ﷺ) گەلەك ب ڤی مروڤی کرە کەنی و گوتێ دێ هەرە هەما بلا بوتە بن ل تە پیرۆز بن.

16. ئەنەسێ کورێ مالکی دبێژیت پێغەمبەر (ﷺ) دناڤ مەدا یێ روینشتی بوو مە دیت کرە کەنی هەتا ددانێت وی دیاربووین ، دبێژیت عومەرێ کورێ خەطابی گوتێ یا پێغەمبەرێ خودێ دەیبابێت من گوری تەبن کا تو بو مە نابێژی دا ئەم ژی بکەینە کەنی، گوت یا عومەر روژا قیامەتێ دێ دوو کەس ئێن ئێکێ زولم یا ل ئێکێ کری و دێ هەردوو لبەرامبەر خودایێ مەزن راوەستن ئەڤێ زولم لێ هاتیەکرن دێ گازی کەتە خودایێ مەزن دێ بێژیت یارەبی تو حەقێ من ژڤی کەسی چێکەی ، خودایێ مەزن دێ بێژیتە کەسێ زالم دێ حەقێ وی بدێ ، دبێژیت یارەبی من چ خێر نەمایە بدەمێ ، دێ خودایێ مەزن بێژتە یێ زولم لێ هاتیە کرن چ نینە بدەتەتە ، دبێژیت چ نینە بدەتە من ، بلا ئەز دێ گونەهێت خو دەمێ ، پێغەمبەری (ﷺ) ل دەستپێکێ ب ڤی مروڤی کرە کەنی ، و دویماهیێ کرە گری و گوت ئەو روژ روژەکا گەلەکا مەزنە و وێ روژێ مروڤ یێ پێتڤی خودایێ مەزنە هاریکاریا مروڤی بکەت کو مروڤ بشێت بارێ خو هەلگریت.

17.ئەبو عەمر ئەلئەنصاری دبێژیت دشەرەکێدا ئەم دگەل پێغەمبەری (ﷺ) بووین برسەکا مەزن دناڤ مەدا پەیدابوو ، ئەو حێشتر و گیانەوەرێت دگەل مە کو لێ سویار دبن چێ نابیت کەس بخوت یان بو خو ببەت ، دبێژیت هندەکا گوتە پێغەمبەری (ﷺ) یا پێغەمبەرێ خودێ ئەگەر تو دەلیڤێ بدەی ئەم دێ هندەکا ڤەکوژین و یێن دی ژی دێ پێ گەهینە مال ، دبێژیت عومەرێ کورێ خەطابی گوت یا پێغەمبەرێ خودێ دەلیڤێ نەدێ ڤەکوژن ئەم ب خو دبرسینە و رابین هندەك حێشتران ژی ڤەکوژین ، من گرتی تێرا دانەکێ کر دانێ دی دێ هەر مینینە برسی ، هەکە ئەم پێتڤی بینێ پاشی و ئەم دبرسی و ب پێیا ژی بچین پاشی ئەم نەشێن چ بکەین ، بلا نەڤەکوژن ، ب رەئیا من هەکە تو بێژیە لەشکەری کا کێ چ هەیە چ زاد بیت چ قەسپ بیت یان هەر تشتەکێ بیت بلا بینن و توژی دوعا بکە کو خودایێ مەزن بەرەکەتێ بێخیتێ و خودایێ مەزن دێ دوعایێت تە قەبویل کەت ، دبێژیت پێغەمبەری (ﷺ) گوت ئەم دێ ب یا عومەری کەین ، گوت کا کێ چ تشتێ خوارنێ هەیە بلا بینیتە ڤێرێ ، هەر ئێکێ تشتەك یێ هەی ئینا هەتا هەمی خلاس بوین ، پێغەمبەری (ﷺ) دوعاکرن گوت یارەبی تو بەرەکەتێ بێخیێ و دبێژیت ئەو زاد زێدە بوو و پێغەمبەری (ﷺ) گوت دێ وەرن ئامانێت خو داگرن ، دبێژیت ئەو لەشکەر هەمی تێر بوو و ئامانێت وان هەمی تژی بوون پێغەمبەری (ﷺ) کرە کەنی.